Paglikay sa mga tawong negatibo’g hunahuna (2)

* Buhata nga utingkayon pag-ayo ang panginahanglan – Kutawa nga mapalugdang sa imong alimpatakan ang mga sangkap sa pagpalugdang sa mga maayong ideya nga maoy hagpaton aron makahulmag positibong enerhiya diha sa imong hunahuna.

Wala na kinahanglana nga paaboton nga magsalig pa sa uban. Igo nalang sila pangayoan natog suporta sa katibuk-ang ideya sa kaugalingon. Kay maglisud tang walay ikaindig sa pagtimbang sa mas maayong  pagbalanse sa pagpinal nga ikaimplementar ang hustong desisyon nga momugna og positibong resulta.

Hinuon usahay dakog kapuslanan ang opinyon sa uban, apan mabinantayon  lang, nga dili kaayo himuong personal aron dili masaypan nga nakasandig lang sa ubang mga opinyon, nga way pagtino sa  maayong resulta nga kapuslan ba kini sa panginahanglan sa kaugalingon.

* Ayaw panumbalinga ang makapalibog – Kini ang sagad sa problema nga abuton ta’g kalibog. Kay unsaon ato man kini gitanggong sa utok nga wala nato anama pagdispatsar ang mga negatibong enerhiya nga hangtud gikapoy sa kalibog.

Inig mata sa buntag, tinguhaon nga mapuno kita sa enerhiya, baskog ang pamatyag sa lawas ug hunahuna, aron makasugakod sa pagsagubang sa kalibogan sa pakigbisog sa tibuok adlaw, diin niining bahina dakug matabang ang nutrisyon sa kahimsog sa atong panghunahuna.

Angay timan-an, nga  dili usikan atong enerhiya sa panghunahuna sa mga butang walay mahatag nga benepisyo sa kaugalingon. Kanunay magpraktis nga palig-unon ang kompiyansa sa kaugalingon.  Hangtud mabansay kita nga makatumbok sa tumong nga mopalig-on sa atong baruganan sa kinabuhi.