EDITORYAL - Community service

Maayo ang bersyon sa Senate committee on justice and human rights alang sa kontrobersiyal nga pagpaubos sa edad sa mga kabataang mahimong manubag sa nahimong krimen, ang community service imbes nga sa prisohan. Si Sen. Richard Gordon, chairman sa maong komitiba pinaagi sa iyang Senate Bill 2195 – nga giusa ang mga bersyon nilang Sens. Joseph Victor Ejercito, Sonny Angara ug Antonio Trillanes IV.

Sila Angara, Trillanes ug Ejercito gusto nga “restorative justice” ang buhaton sa mga kabataang makasala. Dili sila prisohon kondili tudloan sila unsay matarong. Silotan sila pinaagi sa pagserbisyo sa ilang komunidad.

Kini sama sa pagpalimpyo sa kadalanan, pagpananom, pagtudlo sa ubang kabataan gamit ang ilang talent ug uban pa.

Pinaagi niini, mas matarong pa ang kabataang makasala sa balaod ug malikay nga masagol sa mga banggiitang mga kriminal diha sa mga prisohan.

Hinuon ang community service adto lang ipahamtang sa mga salaod nga arresto menor ug arresto mayor. Ang korte maoy mopahamtang niini kun mahimo gyung balaod ang Community Service Act sa Senado.

Ubos sa Revised Penal Code, ang arresto mayor silot nga pagkapriso og usa ka bulan ug usa ka adlaw ngadto sa unom ka bulan. Ang arresto menor silot kini gikan sa usa ka adlaw hangtud 30 ka adlaw.

Maayo kini nga sugyot kun maoy mauyonan sa Kongreso tungod kay may paglaum ang mga batang nakahimo og krimen nga mabag-o ug mapuslan pa sa katilingban inay nga mausik lang ilang kinabuhi.

Di sab angay motagawtaw dayon kining mga tawong emosyon ray nagpalabi nga gusto gyung ipapriso ang mga bata, kay ang bersyon sa Senado, kausa ra maka-avail og community service nga silot, kay kun mousab kini og pabadlong ang full term na sa silot ang ipahamtang.

Sagad sa mga makasala nga mga bata mao kadtong gikan sa mga kabus nga pamilya ug ang sirkumstansya maoy sagad magtukmod kanila paghimo og krimen sama sa pagpangawat aron lang makakaon.