Unsay buhaton kun ilogan ka og yuta?

Dear Atty. Divine,

 Ang akong mga ginikanan nga naa nagpuyo sa probinsya  kalit lang gipapahawa sa ilang gipuy-an sa usa sa mga paryente sa akong papa.

Silang papa dugay na nga nagpuyo niini kay na-inherit pa kini niya sa iyang mga ginikanan.

Wa maaplayi og title ang maong property apan aduna kini Tax Declaration nga nakapangan gyud ni papa.

Karon ang ig-agaw ni papa kalit nga mi-claim nga sila daw ang tag-iya sa property kay napalit daw kini sa ilang mga ginikanan kaniadto gikan sa mga ginikanan nilang papa.

Iyang gihulga silang papa hinungdan nga napugos sila sa pagbalhin tungod sa kahadlok ug ang ig-agaw ni papa mao nay mipuli og puyo sa among balay.

Sa dihang nag-abot sila sa barangay way  gikapakitang dokumento ang ig-agaw ni papa. Unsay dapat namong buhaton aron mapapahawa ang ig-agaw ni papa sa among property?

Wala mi title kondili tax declaration ra ang among gikuptan lig-on ba kini nga ebidensya sa korte ang tax dec? Daghang salamat.

Myra

* * *

Dear Myra,

Mamahimong mopasaka og kasong Forcible Entry ang imong papa batok sa iyang ig-agaw basi sa Section 1 sa Rule 70 sa Revised Rules of Court ngadto sa Municipal Trial Court diin mahimutang ang maong yuta.

Kini tungod sa pwersa niining pagpapahawa sa imong amahan gikan  sa iyang property  pinaagi sa pagpanghulga.

Bisan kun wa kamoy title niini, apan ang pag-occupy sa imong papa sa maong property sud sa daghang katuigan usa kana sa tan-awon  sa korte kun kinsa ang mas dunay katungod nga mokupot o mo-occupy sa property.

Ang kasong Forcible Entry summary in nature busa mas dali kining mahuman.

Kun ang korte modesisyon pabor sa imong papa, ang Sheriff sa korte na mismo ang mopatuman sa mando ug maoy mopapahawa  sa ig-agaw sa imong papa nga miilog sa inyong property. Thanks and God bless.

Atty. Divina

* * *

Alang sa inyong pangutana, ipadala lang pinaagi sa email sa flores_ [email protected] ug akong tubagon  ang inyong pangutana pinaagi  sa akong column  matag Miyerkules, Sabado ug Domingo.