Milagro o kalig-on?

Ikaduhang adlaw sa misa-nobena alang sa kapistahan ni Senior Santo Niño, nanimba ming misis sa 5:30am nga schedule.

Sa kataas pirmi sa homiliya sa pari, pun-an pa sa bagang duot sa katawhan nga nanimba sulod ug gawas sa Pilgrim Center, dili gyud untop mahuman og usa ka oras ang misa.

Mao nga panahon sa pagpangalawat, ang mikalawat dili na mobalik sa iyang gilingkoran. Kondili, molahos na la’g gawas sa basilica kay nahadlok ma-late sa trabaho.

Akong misis, kinsa hadlok pung ma-late, miagda nga manggawas na lang sab mi. Hugot kong mibalibad. Kay ang misa wala pa mahuman. Wala payfinal blessings sa pari.

“Ay, sige lang. Total, madungog ra bitaw gihapon nato iyang tingog samtang mopaingon ta sa giparkingan sa atong sakyanan.” Esplikar ni misis dayong una-una’g lakaw.

Tanan niyang gamit, tua sa among sakyanan. Busa, bisag kontra sa akong buot ang pagbiya sa misa nga wala pa matapos, napugos ko’g paundayon niya. Samot kay 6:45 am na ug 7 am iyang sulod sa trabaho.

Diha na mi sa Pete’s Kitchenette tungod, pa-left turn sa Sanciangko paingon sa iyang trabahoan, dihang mipula ang traffic light. Busa, gitamakan ko ang brake

Naghunong na mi. Apan naunsa ba, nga pagkataudtaod, mikalit man la’g paka ang likod sa among sakyanan?

Nanaog si misis. Ug iyang nasayran nga gidumbol diay ang back bumper namo sa tayaon ug karaan na kaayong PUJ. Hastang grabehang pagkakang-a sa right rare bumper sa among sakyanan, uy!

Resulta?  Aw, grabeng ka-late ni misis nga naka-report sa iyang trabahoan.

Unya, nakahinuktok kadiyot daplin sa dalan. Nadunggan niya’g balik ang akong pag-ingon ganina sa simbahan, nga dili maayo nga mobiya sa misa kun wala pa mahuman. Kay kun mitiwas pa lang mi, malikayan gyud unta namo ang maong disgrasya.

Apan nahibulong mi pag-abot sa CITOM nga miimbestigar. Kay dihang among gisusi  ang likorang bumper nga gidasmagan sa danghag nga PUJ, wala diay kini malumping bisag gamay. Hasta, pintal nagpabiling sinaw nga wala gyuy garas. Igo rang na-detached ang bumper gikan sa gitaptan niini.

Mao nga nakapangutana ko: “Nagpasabot ba kini sa  kalig-on sa body parts sa bag-ong sakyanan nga among napalit, o gimilagrohan mi ni Sr. Santo Niño?