Ang sayo nga sinyales sa kanser (3)

* Kausaban sa antgal (nipples) – Dunay makita nga kausaban nga dili normal sa atngal, sa dili pa madayagnos kini nga breast cancer. Sama sa pagdaku nga molapad ang atngal sa tuo ug wala. Mamula nga sakit kaayo tandogon o pamation. Apil sab nga manakit ang dughan ug mga suso. Mahimo nga indikasyon kini sa implamasyon ug kanser sa suso. Kinahanglan dili kini dugayon nga ipakonsulta sa doktor mentras sayo pa mahimoan og paagi.

* Kausaban sa kuko – Ang dili masabot nga makitang kausaban sa kuko, kalagmitan senyales sab kini sa mga tipo sa kanser. Usahay ang brown nga kolor sa kuko, o kaha itom nga batikbatik, diin nagpasabot kini sa senyales nga skin cancer. Hasta ang pagpanagko sa titip o tumoy sa kuko, mahimong senyales kini sa kanser sa baga. Maingon man ang pagdugo ug pagpula  sa kuko, usahay mamuti nga morag patay tan-awon, mahimong senyales sa kanser sa atay.

* Ang kanser kaniadto - maihap lang ang mopuyo sa lawas, pero karon mas isog pa ug daghan nang klase o tipo sa kanser, gumikan sab sa kagrabe sa palibot karon nga ang kalibutan napuno sa toksik, polusyon ug radiation. Busa aron kamenusan ang epekto niini sa atong lawas, kanunay ta magkupot og kahibalo sa tanang paagi sa pagdepensa sa sakit nga makakanser.

Ang labing unang buhaton nga masanta ang kanser, mao ra gayud ang seryuso nga pagmatngon sa mga pagkaon nga kontaminado sa kemikals ug disiplina sa paggamit sa kahimanang tinubdan sa mga radiation.

Sa ingon dili kita maantimano nga direkta maapektohan nga ang lawas makagamot ang kanser.

Kay dili lalim nga matakboyan kitag sakit nga kanser, busa pakigbisogan nga modaug ta sa paghingilin niini aron malibre nga dili maugtas sa pag-antus.