Iyaan gustong idonar sa pag-umangkon ang farm land

Dear Atty. Divine,

Ang akong iyaan nga atua na magpuyo sa gawas sa nasud mipalit og farm land ug kami ang nagsilbing care taker niini.

Plano unta sa akong iyaan nga i-donate ang maong property ngadto sa akong anak nga 10 anyos.

Ang akong pangutana nga pwede ba kini niyang buhaton nga minor de edad  pa man ang akong anak? Daghang salamat.

Lea

* * *

Dear Lea,

Basi sa Article 741  sa atong  Civil Code ang minor de edad mamahimong donee o modawat og donasyon provided nga ang iyang mga ginikanan  maoy mopirma sa acceptance niini tungod kay ang  minor de edad di pa man mamahimong makapirma og bisan unsang kontrata o  kasabutan.

Basi usab sa balaod ang pagdonar og real property kinahanglan nga in writing ug dunay acceptance sa  donee o sa gihatagan kun ang idonar usa ka real property. Busa kun mo execute og Deed of Donation ang imong iyaan in favor sa imong anak dapat ikaw isip inahan ang mopirma sa acceptance niini aron mamahimong valid ang donasyon. Thanks and God bless.

Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules,  Sabado ug Domingo.