Angayang patas

Politika maoy gidudahan sa kapolisan nga motibo sa pagbanhig sa sakyanan ni San Fernando Mayor Lakambini “Neneth” Reluya niadtong Martes sa hapon didto sa dakbayan sa Talisay resulta sa kamatayon sa iyang bana ug laing duha pa nila ka mga kauban.

Naangol sab ang mayor ug kasamtangang nagpa-alim sa iyang samad sa bukton sulod sa usa ka pribadong tambalanan.

Ang mga namatay mao sila si Ricardo “Nonoy” Reluya Jr., driver nga si Ricky Monterona, ug usa sa mga staff sa mayor nga si Allan Bayot.

Ang pagpamanhig nahitabo pipila ka adlaw lang human laing opisyal sa San Fernando nga si konsehal Reneboy Dacalos ang gipusil patay.

Labing minos upat na ka mga opisyal sa San Fernando ang napatay sukad sa miaging tuig.

Niining maong mga kaso wala pay usa nga nasulbad. Lahi sa ubang mga kaso sa pagpamanhig ug patay, ang kaso ni Reluya daw sa nakadapit sa pagtagad sa kaulohan.

Ang hepe sa kapolisan sa nasud, Dir. General Oscar Albayalde, mimando sa kapolisan dinhi sa Sugbo pagsulbad sa krimin sulod sa duha lang ka semana.

Duna pay pakapin nga bahad nga posibling matangtang sa iyang pwesto ang provincial director nga si Sr. Supt. Manuel Abrugena kun di masulbad ang maong kremin sulod sa duha ka semana niyang tagal. Tungod niini dako ang akong pagtuo masulbad sa dili madugay ang maong kaso.

Apan unsay nakaespesyal sa pagbanhig ni Reluya itandi sa ubang susamang kaso dinhi sa Sugbo?

Hinaut nga ang ubang kaso sa patay nga hangtud karon wala pa masulbad ingon sab niini ang pagtagad nga ihatag sa kadagkuan sa kapolisan sa nasud.

Dili malikayan nga mamatikdan sa publiko ang lahi nga tratamento niining maong kaso kay sa ubang mga kaso sa pagpamanhig. Motibo ba maoy gibasihan sa kapolisan kanus-a sila maninuod og imbistigar?

Nakapangutana ko niini tungod kay ang ubang kaso diin drugas maoy gidudahang motibo, hilom man ang kadagkuan sa kapolisan.

Gani hangtud ron wa gyuy resulta ang ilang imbistigasyon. Pananglitan, ang pagpatay sa mayor sa Ronda nga si Mariano Blanco ug sa iyang bise mayor nga si John Ungab, unsa na may resulta sa imbistigasyon?

Wala ta makadungog nga mihatag ang hepe sa kapolisan sa nasud og ultimatum pagsulbad sa maong mga kaso.

Ang akong punto mao, bisan unsay motibo sa krimin angayang patas ang pagtagad nga ihatag sa kapolisan.