Miresulta na

Daan pa gyud ko nga moabot ra ang higayon nga mapasakaan og kaso si Konsehal Pastor Alcover Jr. tungod sa iyang pag-post og mga article sa social media nga ang uban niini, giingong kuwang og basehanan.

Karon, si Mayor Tomas Osmeña maoy mipasaka og kaso batok kaniya didto sa Office of the Ombudsman-Visayas tungod sa giingong paglapas niya sa Cybercrime Prevention Act; Grave Misconduct ug kalapasan sa Code of Conduct and Ethical Standards for Public Officials and Employees.

Kaniadtong gabii sa Disyembre 21, dunay post sa Facebook sa account nga “Jun Alcover Jr.” nga mora’g nagpasabot nga si Osmeña midapig niadtong batan-ong tinun-an sa Ateneo sa kaulohan nga nag-bully sa iyang classmate.

Ang post sa FB dunay hulagway sa mayor, ug ang mga pulong “This boy was not really bullying, he was just teaching his classmate a lesson. Ateneo and the Jesuits are close to my heart, I know they will get through with this.”

Matud ni Osmeña nga wala gyud siya magsulti niini ug naghimohimo ra og pamahayag ang konsehal aron nga ingnon nga siya milaban sa bata nga nag-bully sa iyang kaklase didto sa kaulohan.

Ambot og unsa kaha’y tubag niini ni Alcover kay gikontak nako ang iyang mobile phone kagahapon, mi-ring man, apan gi-cancel. Dili tingali gusto nga magpa-interview.

Nakabantay bitaw ko nga dunay mga post si Alcover nga dili tinuod.

Sama niadtong article nga gi-share niya sa FB nga si Guadalupe Barangay Captain Michael Gacasan giingong nagpapublikar sa mantalaan ug nangayo’g pasaylo sa VECO kay nakapangawat og kuryente.

Dili man tinuod. Swerte lang kay si Gacasan wala pa makahunahuna nga mo-file og kaso.

* * *

Ugma na gyud buksan ang Devotee City diha sa kilid sa karaang Compania Maritima building aron nga kapuy-an sa mga deboto ni Señor Santo Niño nga gikan sa lagyong lugar ug walay kapuy-an dinhi.

Angay’ng pasalamatan si Mayor Tomas Osmeña pinaagi ni Cebu City South District Councilor Eugenio Gabuya Jr. nga maoy nagdumala karon sa mga kalihukan aron nga sa gihapon makaserbisyo ang siyudad sa Sugbo ngadto sa mga walay kapuy-an nga gikan sa ubang lugar.

Gibanabana nga kapin sa 3,000 ka tawo ang maserbisyohan sa dakbayan pinaagi sa pag-abag usab sa lainlaing mga opisina ug pribadong mga kompaniya.

Mi-coordinate si Konsehal Gabuya sa MCWD aron ang mga debotos kahatagan og libre nga suplay sa tubig, mainom, pangkaligo ug panglaba.

Duna pa’y giandam nga mga donasyon nga pagkaon. May mga polis ug guwardiya nga idestino, ingon man libre nga Wi-fi. Maninguha usab si Gabuya nga makapasundayag og kalingawan ang drama team sa COSAP.