Practice driving estriktohon

Suportahan gyud nako kining gisugyot nga ordinansahon ni Cebu City Councilor Eugenio Gabuya Jr. nga magdili sa mga “student drivers” pagmaneho og sakyanan sa mga “busy” kaayong karsada dinhi sa dakbayan.

Kun kini mapasar sa Cebu City Council ug mapirmahan ni Mayor Tomas Osmeña, did-an na ang mga student drivers sa pagmaneho og sakyanan subay sa Osmeña Boulevard; Natalio Bacalso Avenue; P. del Rosario Street; P. del Rosario Extension; Gorordo Avenue; Sergio Osmeña Jr. Boulevard; South Coastal Road sa SRP; V. Rama Avenue; General Maxilom Avenue ug F. Ramos Street.

Kaniadtong miaging adlaw, nahibulong ko nga ang ubang sakyanan nga akong gisunod, ni-counterflow man sa Gorordo Avenue. Mao diay nga napugos ang ubang motorista pag-counterflow kay ang sakyanan nga gimaneho og student driver, napagngan sa makina ug dugay kaayong nakapaandar pagbalik.

Dangtan og pila ka minutos, nidagan na pagbalik ang sakyanan sa student driver apan nag-aginod nga mura gyud og gikusgon sa porlon. May gipapilit sa likud “Student driver.”

Mao nga nakaingon ko nga nindot gyud nga aprobahan kining ordinansahon ni Konsehal Gabuya kay kon tugotan ang mga student drivers nga magpraktis sa mga busy nga karsada, makapasamot ni sa traffic.

* * *

Nakadawat ko og email gikan sa usa ka senior citizen sa Mandaue City. Suhito kaayo kini sa pamaagi sa budget. Ang Mandaue City Council diay, nipasar na og budget ordinance nga nagtataw gyud sa kantidad nga igahin para sa financial assistance sa mga Senior Citizens, Persons with Disability (PWD), SK scholarship, ug sa Department of Education (DepEd).

Wala uyoni sa City Council ang gisugyot ni Mayor Luigi Quisumbing nga himuong lump sum ang budget alang sa maong katuyoan.

Dihang gipadala na sa opisina sa mayor ang budget ordinance nga napasar sa City Council, nakurat ang mga konsehal kay gibalik man nga lump sum na sa budget.

Mura’g makontrobersyal na sab tingali kining maong isyu. Husto ang pangagpas sa higala nako nga senior citizen nga mora’g gusto ni Mayor Luigi nga moluhod kaniya ang mga sektor nga aron magahinan sila og financial assistance.

Para kanako, nindot gyud kadtong dunay “specific” nga kantidad kun pila ang para senior citizens, PWD, SK, DepEd ug uban pa.

Sama gud sa Dakbayan sa Sugbo nga ibutang gyud ang kantidad nga igahin sa matag proyekto. Tan-aw nako niini, imbes makakuha og sentimento si Mayor Luigi gikan sa mga sakop sa lainlaing sektor, posible nga maglagot hinoon sila kaniya.

Ambot og tinuod ba ang giingon sa senior citizen nga akong amigo nga basin gusto ni Luigi nga lump sum kay daghan ra ba kaayo ang mga Job Order workers nga iyang sweldohanan.