Namolitika sa nasunogan

Nakabantay gyud ko nga dunay pagpamolitika nga gihimo ngadto sa mga biktima sa sunog sa Barangay Duljo-Fatima dinhi sa dakbayan sa Sugbo.

Una, ang pagpanghatag sa pagkaon gikan sa Department of Social Welfare and Services (DSWS) tua ni gihimo sa San Nicolas Elementary School sa Carlock Street nga layo ra kaayo sa giestahan sa kadaghanang fire victims.

Gisusi nako ang sports complex sa Barangay Duljo-Fatima nga nahimutang kilid ra sa barangay hall, may dapit pa man nga adto mapapanghatag sa pagkaon. Klaro kaayo nga dili gusto ang mga tinugyanan sa City Hall nga adto manghatag og pagkaon sa sports complex kay ang kapitan nga si Elmer Abella dili man kaalyado sa mayor.

Ikaduha, samtang si kanhi Special Assistant to the President (SAP) Bong Go nagpahatag og mga pagkaon ug ubang tabang ngadto sa mga fire victims, ang konsehal nga kaalyado sa Partido Barug nagsige og anunsyo sa mga ngalan sa mga kandidato sa ilang grupo.

Samtang nagtan-aw ko sa maong kalihokan, nakapanglingolingo ko kay wala gyud ko makagusto. Sama nga wala ko makagusto nga ang pagpanghatag sa pagkaon kinahanglan pa nga hasolon ang mga fire victims sa paglakaw og mga usa ka kilometro aron makuha ang ilang food allocation, wala sab ko makagusto sa gihimo ni Konsehal Gian sa Duljo Fatima.

Ambot unsaon kaha niya sa pagpasabot nganong gihimo niya kadto.

Arang-arang na lang niadtong mga kandidato nga miadto didto alang sa ilang politikanhong ambisyon nga gisinggit ni Gian ang ilang mga ngalan, apan ang tanan man gyud nga kandidato ang gihinganlan.

Pastilan, undanga na ninyo kanang pagpamolitika uy.

Kon mamolitika man gani, hala, tabangi ang mga nasunogan sama sa gihimo ni SAP Bong Go.

Dili kay bisan og walay gitabang apilon ra gyud pag-anunsyo ang ilang mga ngalan. Usbon nako, wala ko’y gilabanan niini sa duha ka grupo nga parehong namolitika.

* * *

Walay pagsupak ang mga tag-iya og sinehan dinhi sa dakbayan sa Sugbo nga mopasalida sila og libre nga video advocacy nga mag-awhag sa katawhan sa pag-abag sa kagamhanan sa tukmang paghipos sa atong mga basura.

Ang mga cinema operators mipadala og suwat ngadto sa Cebu City Council nga wala sila’y supak sa ordinansahon ni Konsehal Eugenio Gabuya Jr. nga mopasalida sila og video nga mag-awhag sa katawhan nga ayuhon paghipos ang atong mga basura sa dakbayan.

Nindot kining ordinansahon ni Gabuya kay magpahinumdom ni sa katawhan, ilabi na sa mga batan-on, nga masayod sila sa epekto kon magpataka ra kita’g labay sa mga sagbot.