EDITORYAL - Politika sa hinabang

Ang katalagman dili gyud matag-an ilabi na kun kini mahitabo panahon sa Kapaskohan nga diin ang mga tawo maglipay-lipay unta kauban ilang mga pamilya. Apan mas sakit kaayong paminawon kun hikawan pa gyud sila sa angayang tabang nga unta ilang madawat.

Mao kini ang subo kaayong kahimtang sa mga nasunogan sa Barangay Duljo-Fatima sa Dakbayan sa Sugbo.  Naa sila karon magpasilong sa barangay covered court ug anha na usab nila sugaton ang Bag-ong Tuig sa mabugnaw nga semento sa maong edipisyo.

Kuwang sila sa mga gamit sama sa katulganan, mga sapot, lutoan ug bisan gani pagkaon ug tubig mainom nihit kaayo para sa ubang mga nasunogan nga daan nang walay ikasarang.

Apan nangreklamo karon ang mga nasunogan kay giingong hasta ang hinabang gikan sa siyudad para kanila gilisud-lisod pa gyud og hatag.

Kay inay nga direktang ihatag ngadto sa barangay gymnasium ang maong mga hinabang kinahanglang didto kini kuhaon sa dapit nga gitagana sa siyudad diin ipanghatag ang hinabang.

Tungod niini, mireklamo ang mga nasunogan kay gikinahanglan pa nilang mamelete padung sa lugar aron kuhaon ang ilang hinabang.

Sumala pa sa pasangil dili gusto sa taga siyudad nga mapunta sa barangay ang ‘credit’ sa paghatag sa maong mga hinabang.

Ingon niini na diay karon ang siyudad sa Sugbo? Hasta ang hinabang kinahanglang may tawong makabenepisyo sa ‘credit?’ Pait na gani ang kahimtang sa mga nasunogan, politikahon pa gyud hasta ang hinabang nga ilang gikinahanglan.

Si Bise Mayor Edgardo Labella namahayag sa mga tigbalita nga angay untang giuna ang panginahanglan sa mga biktima ug dili ang pamolitika.

Hinuon taliabot na ang eleksyon, mahimong adto nalang mobawos ang mga biktima sa sunog sa mga politikong nipuno sa ilang kasakit ug kalisdanan karong kapaskohan.