Bahala na

Bahala na og dako ko og gasto, ako lang gyod nga hatagan og pahulay sa trabaho ang akong kaugalingon ug ubanan ang pamilya sa ilang gusto. Bisan man lang karon nga Pasko.

Bahala na og sa akong pagbalik nagtapun-og ang akong mga gimbuhaton sa tunghaan sama sa pag check sa test papers, paghimo og grado sa mga estudyante ug pagtoon ug pag-review sa bag-ong subject nga gihatag kanako sa College of Arts and Sciences human mag resigned ang magtutudlo nga naghupot niini, dili lang gyod sa ko maghuna-huna niini sa akong pagbakasyon.

Bahala na og daghan kog gibiyaan nga pirmahanan sa opisina sa barangay kay wa gyod nako maato sa pagpirma sa wala pa ko molarga, dili lang gyod ko magpaapekto niini aron masulit nako ang akong bakasyon uban sa akong pamilya.

Bahala na og daghang tigpaminaw sa akong programa sa DySS Super Radyo Cebu ang nangita sa akong tingog ug nagpakisayod kanus-a ko mobalik sa kahanginan, dili lang gyod ko nila magpakabana kay nasayod ako nga makasabot ra sila sa akong kahimtang nga panagsa ra makabakasyon og taas-taas tungod sa ka-busy sa trabaho.

Bahala na og pamiliti na lang ang mahabilin sa ako kuwarta sa ako pagbalik sa Sugbo, dili nako ni balihon, ang importante nagpasko, nagsaulog sa akong ika 12 ka tuig nga church wedding, nakatambong sa fiesta sa patron sa lungsod sa Bien Unido, Bohol nga si Sr. Santo Niño ug nakaasikaso sa gamay nga yuta nga sinunod sa mga ginikanan.

Bahala na og alas 11:30 na sa gabii ug ako nalang usa ang nagtikaw-tikaw sa balay sa akong ugangan nga among gisak-an ug bisan mopiyong na ang akong mata, pugos nakong gihuman kining akong lindog alang niining adlawa.

Pastilan, bisan unsaon pamahala, mangiyawat lang gihapon nga makakuwarta aron may madaginot nga sinsilyo sa akong pagbalik sa Sugbo.