Tubig gikan sa prisohan?

Mipadangat og reklamo ang mga molupyo sa likod nga bahin sa Lapu-Lapu City Jail nga nahimutang sa Barangay Soong.

Kabahin kini sa nagpundo nga tubig sa ilang dapit nga walay paghubas nga nahisama na sa lake.

Ang tubig nangitom na sa kahugaw ug adunay laing baho nga nakapasamot sa kalbaryo sa mga tawo.

Mipasangil ang mga tawo nga gikan sa jail facility ang tubig nga gi-drain nila sa gawas ug mao kini ang hinungdan nga dili na gyud mohubas ang tubig.

Gituboan na gani og water lily, nahimo na usab kining pinuy-anan sa mga nguyo nguyo nga maoy mamahimong lamok.

Ang nakaparat usab kay ang tabay nga maoy gikuhaan nila og tubig pangkaligo, pangluto sa pagkaon naapektohan na man.

Nagbula na ang tubig sa tabay hinungdan nga wala na gamita sa mga tawo sa kabalaka nga makakuha sila og mga balatian.

Nasayran nga dugay na kining problema nga nasolusyonan na kaniadto maong nauga na unta ang dapit.  

Apan nibalik naman usab karon nga naghatag og kalbaryo sa mga molupyo ilabi na sa mga bata.

Nanawagan ang mga molupyo nga maaksyonan kini sa tagdumala sa bilanggoan.

Samtang gipadayag ni Mayor Paz Radaza nga ipatawag niya ang kadagkoan sa jail facility mahitungod niini nga problema.

Samtang alang sa mga molupyo sa dapit mas maayo sab nga limpyohan nila ang ilang palibot kay nakapadugang sa ka hugaw ug sa baho ang mga basura nga anaa sa palibot.