Maayo kay wala nasayop si Harvey

Wala dayon ko makatuo sa pagbungat ni Steve Harvey nga ang kandidata sa Pilipinas maoy mananaug sa Miss Universe 2018.

Sulod sa pipila ka gutlo, naglatagaw akong hunahuna ug akong gikarkula kun tinuod ba gayud ang iyang gianunsiyo.

Apan paglabay sa pipila ka gutlo, wala ko makadungog og dispensa gikan maong host sa Miss Universe nga didto sa Bangkok, Thailand gipahigayon. Kini ang hinungdan nga naka-realize ko nga tinuod gayud diay ang anunsiyo ni Harvey.

Midaug gayud diay ang pambato sa Pilipinas nga si Catriona Gray sa labing dako ug prestihiyosong beauty pageant sa kalibotan.

Ikaduha na kini ka titulo nga naangkon sa Pilipinas sulod sa tulo ka tuig.

Kaniadtong 2015, nagmaya kita sa dihang nalangkat ni Pia Wurtzbach ang korona sa Miss Universe human sa pipila kja dekada.

Apan nasagulan og drama ang iyang kadaugan tungod kay sayop nga ngalan ang gideklara ni Harvey nga mananaug.  

Na-phobia na man gud ko aning Harvey. Mao nang wala dayon ko makatuo sa iyang anunsiyo kang Gray nga maoy manananug niadtong Lunes.

Kay basin kon sayop siya sa ang iyang deklarasyon ug unya ang pambato sa South Africa diay ang midaug.

Ug maayo na lamang nga wala na gayud masayop si Harvey niining higayona.

Insakto ang iyang deklarasyon nga si Catriona Gray gayud ang midaug pagka-Miss Universe.

Giayo gayud pagbasa ni Harvey ang lista sa mga mananaug.

Siguro kun nasayop pa si Harvey sa iyang pagbasa ug si Miss South Africa diay ang tinuoray nga midaug, dili ko ka-imagine sa kadako sa pag-alburoto sa mga Pilipino.

Siguro entiro nasud ang mag-ugot gayud sa maong host.

Kun ugaling nahitabo kadto, dako akong pagtuo nga mosakay usab ang atong mga magbabalaud ug modeklara kang Harvey nga persona non-grata.  Kuyaw nga dili na gayud makasulod ang maong host dinhi sa nasud.

Sa laing bahin, dako usab ang pasalamat sa mga Pilipino nga wala gayud masayop si Harvey sa iyang pagbasa kang Catriona Gray isip mananaug sa Miss Universe 2018.

Kay kun nasayop pa ang host, siguro daghan ang giatake sa kasingkasing gumikan sa kalit nga pagkapalong sa sobrang kalipay.