Pampublikong CR, may bayad?

Kataw-anan! Dinhay usa ka higayon, buntag sayo, misulay mig pangompra’g isda sa Ramos Public Market. Usa sa mga namaligya nagsige’g tan-aw sa akong nawong unya moduko-lili sa inadlaw’ng mantalaan nga iyang gibitbit.

Taudtaod, gitik-op sa tawo ang gipakli niyang tabloid. Ug nabantang sa akong panan-aw ang ngalan  – The Freeman/Banat News, nga maoy nakatubag sa dakong pangutana nga hilom naglublob sa akong kahiladman nganong nagpunay siyag sud-ong nako ganina ug mikomparar sa akong nawong didto sa hitsura nga mipilit sa mga panid sa Opinyon.

Nakapahiyom ko sa tago. Ubay-ubay na gayud ang na-in love pagtener-basa og kopya sa Banat News kada adlaw, diin usa ko sa mga lamiang lamas sa maong tabloid nga nahikap, natilawan ug napaod  pud og apil dul-it sa ilang dughan timaan sa walay paglubad nilang pagmahal.

Apan naputol kadiyot ang pagpamili ko’g isda dihang sugo sa lawas, kinahanglang adtoon dayon nako si Chanda Romero aron gamiton.

Wala ra ba dayon makasabot kadtong giduol kong tindera’g utanon kinsang Chanda Romeroha ang akong gipangita? Pero pag-ingon nako’g CR, dinha pa siya mitudlo hain ang pansayan.

Pastilan, puwerte nakong dalidali kay daw kabuthonon na akong pantog. Duol sa pultahan, may babayeng nagbantay. Milahos ko’g sulod ug igo ra kong nakaabot sa urinal area, gibuhos ko’g hurot ang nagbusagak kong tubig nga dugay nahuman. Hangtod naangkon ko sa hingpit ang  kahayahay sa  kalamposan.

Mogawas na unta ko, dihang gipaningil ko’g P5 (singko pesos) sa babayeng nagbantay. Nakurat ko. Dili tungod sa balor sa sensilyo. Kon dili, sa patakaran nga bayaran diay ang mogamit og CR sa gobiyerno. Hala, no?

Dili ba ang kuwartang gipatukod og kasilyas sa pampublikong kamerkadohan,  gikan man sa buhis sa katawhan? Unya, nganong pabayron pa man ang mogamit? Gani, sa mga malls nga de aircon pa, libre man ang  CR alang sa tanan.

Luoy ang katawhan. Kulatado na sa bisan unsa na lang klaseha sa buhis nga gi-imposed sa gobiyerno,  unya paninglon pa gyud kun mogamit sa CR.  Simbako uroy, maatlang walay ikabayad? Mangihi na lang sa underwear?

Bitaw, hangyo lang, Mayor Tommy. Pwede ba nga hunongon na ning pagpaningil og CR fee sa atong mga pambulikong kasilyas?