Mga benepisyo sa pinya (1)

Kaniadto ang pinya , espesyal nga prutas nga idalit lang ngadto sa mga halangdon o mga prominenteng tawo.Dili kini maabot sa mga yano nga katawhan kaniadto.

Gumikan sa kamahal o kanihit ini sama sa bulawan nga ingon sa mao say makita nato nga bulok sa unod sa pinya nga may pagkadalag ang bulawan (yellowish gold). Maglaway kita sa katalagsaon sa iyang katam-is.

Nabaniog nga una kini natilawan sa grupo ni Christopher Columbus, ug ilang gidala sa Uropa ug didto nahimong popular nga espesyal nga prutas.

Apan si James Dole, usa ka industriyalista sa Hawaii, maoy nakahupot sa pasidungog isip hari sa pinya (pineapple king). Gumikan kay siya ang responsable sa pagpananom ini sa tibuok kalibutan, nga karon hasta mga kabus o ordinaryong tawo makaabot na sa pagkaon, nga anaa na sa mga merkado o supermarket.

Unsa bay mga benepisyo sa pinya nga mahatag sa atong panglawas? Ania atong sundan ang mga mosunod nga detalye;

* Dasok nga tinubdan sa Vitamin-C – Ang pinya, usa sa daghang tinubdan sa antioxidant nga vitamin-C, nga alang sa pagpalig-on sa imyun nga sistema. Nagbaton kinig 131% nga (DV)  inadlaw nga panginahanglan sa lawas. Nga kumon gigamit sa pagsanta o pagpugong sa ubo, hilanat, flu nga sintomas. Ang vitamin-C. maoy nagmintin sa mga tisyu sa lawas.

Isip antioxidant, aduna ni abilidad sa paghimog collagen sa lawas, nga maoy naglabing protina nga responsable sa kahimsog sa mga agianan sa dugo (blood vessels).

Motabang sab ang vitamin-C, nga moaway batok sa ‘free radikals’, ug pagmenus sa risgo sa implamasyon, nga sagad maoy nakatampo nga luyahon ang mga sundalo sa lawas nga dominahon sa mga selyula nga kanser.