Matinabangon nga opisyal

Kamong mga gustong magpapili sa katungdanan sa kagamhanan, hatagi gyud ninyo og dakong pagtagad ang pag-atiman sa panglawas sa katawhan kay aron panggaon kamo sa mga botante.

Kuhai ra gud ninyo og pagtulon-an ang popularity rating ni Special Assistant to the President Christopher Lawrence “Bong” Go nga mikalit lang pagsaka sa ikawalo nga pwesto sa survey sa usa ka radio network dili pa dugay.

Kaniadto, kini si Bong Go wala gyud maapil sa “magic 12” apan mikalit lang pagsaka ang rating, wala pa’y usa ka tuig human siya giendorso ni Presidente Duterte nga kandidato pagka senador.

Tungod kini kay aktibo kaayo si Bong Go sa Malasakit Program, nga mao ang pagtabang sa mga kabus nga dali ra sila nga makakuha og tabang gikan sa lainlaing ahensya sa kagamhanan sa ilang pagpaospital.

Sa ako na nga giingon kaninyo, ang maguwang nako didto sa Davao City, gitabangan ni Bong Go bisan og dili pa gani presidente si Digong Duterte kaniadtong Marso 2015, mao na nga nahimo nako siyang higala.

Dinhi sa ato sa Sugbo, mga higala nako sa Pulpogan, Consolacion mitug-an nga popular usab kaayo si Dr. Paulus Cañete kay ang programa ni Doc Paulus mao nga mohatag siya og gamay’ng kantidad alang sa pagkaon sa magbantay sa mga pasyente sa Vicente Sotto Memorial Medical Center.

Dili ba maayo man sab?  Ingon unta niana, dili kay pulos lang sulti, lihok gyud ang pasultihon.

* * *

Pag-anhi ni Ilocos Norte Governor Imee Marcos sa Dakbayan sa Sugbo kaniadtong Miyerkules, dunay mga tawo nga naghimo kunohay og protest rally kay kuno gisaway nila ang anak sa kanhi presidente.

Abi ninyo og unsay nahitabo? Nakabalda sila sa kalihukan sa mga konsehal sa kalungsuran ug siyudad. Unya, dunay press conference si Imee sa Waterfront Hotel, napugos ang mga guwardiya sa pag-estrikto sa seguridad.

Ang usa ka entrance-exit road sa hotel gisirad-an ug wala paagii og bisan mga tawo nga maglakaw. Nahasol intawon kaayo ang kauban namo nga veteran broadcaster nga si Manny Delos Santos Rabacal kay halos wala pasudla sa entrance.

Pastilan kining mga tawhana. Klaro kaayo uy, kun ngano nga naghimo kamo sa maong protest rally. Nasayod kita nga ang mga rally nga himoon sa mga militant groups, gitumong aron ang mga nagpasiugda makakuwarta.

Busa, kamong mga tinun-an nga awhagon sa lider niining maong grupo, ayaw gyud kamo patintal kay gigamit ra mo aron ang inyong mga lider makasapi gikan sa pundo sa mga international funding group nga gustong magubot ang atong nasud.