Naglibog sa balaod
Nasupo na sab si Presidente Rodrigo Duterte human nipasidaan nga mopirma siya og executive order paghimong mandatory sa Reserved Officers Training Corps (ROTC), gisukwahi siya ni Presidential Spokesperson Salvador Panelo nga nagkinahanglan og balaod sa Kongreso una mapatuman ang iyang plano.
Nahimangod man gud ang presidente nga wa tagda sa mga kongresista ug mga senador ang iyang awhag kapin sa duha ka tuig nang nilabay sa pagpugos sa mga tinun-an pagkuha sa ROTC sama sa karaang panahon. Maong nihulga pagluwat og executive order pagduso sa programa nga gisigehan niya og hisgot.
* * *
Sa iyang pakigpung sa Tanza, Cavite sa niaging semana, gipahibawo sa presidente nga gitun-an na sa mga abogado sa Malakanyang ang mga probisyon sa iyang pirmahan nga executive order nga mohimong mandatory sa ROTC alang sa mga tinun-an sa Grade 11 ug 12.
Kon basehan ang sulti ni Panelo, nga mao say presidential legal counsel, mahimong wa makumbinsir sa presidente ang iyang mga abogado sa gisubli-subli niya nga baruganan nga mahimo rang usbon og yano nga executive order ang balaod nga naghimo sa ROTC nga optional.
* * *
Mahimong mapugos ang presidente nga sa pagpalihok sa iyang makabungog nga mayoriya sa House of Representatives ug Senado sa pag-usab sa Republic Act No. 9163, ang National Service Training Program (NSTP) Act, nga naghimong optional sa ROTC uban sa Literacy Training Services ug Civil Welfare Training Service.
Ambot abogado man unta nganong nalipat ang presidente sa batakan nga lagda sa pagpanday og mga lagda nga ang balaod sa Kongreso mausab lang sa laing balaod sa Kongreso, o mabasura lang sa korte, apan di mahimong sapawan og executive order.
* * *
Maglisod hinuon ang presidente sa pagpugos sa Kongreso pagtando sa bisan unsa niyang sugo. Labing uwahing pruyba mao ang kauwawan sa pagkalangay sa pagpasar sa nasudnong budget sa labing unang higayon sa walo ka tuig.
Apan ang labing dakong babag sa iyang kawsa mao ang nangalisbong kahiwian ug mga eskandalo sa karaang ROTC. Gani, napasar ang RA 9163 tungod sa kamatayon sa tinun-an nga si Mark Welson Chua. Kinsa gikulata sa cadet officers sa University of Sto. Tomas (UST) human niya gibisto ang kahiwian sa ROTC sa eskuylahan.
* * *
- Latest
