Kon ang bana ug asawa pulos nakasala sa usa’g usa
Dear Atty. Divine,
Ang akong igsuong lalaki minyo ug nahibaw-an karon sa iyang asawa nga duna siyay laing babaye kay panagsa ra man siya mopauli sa ilang pinuy-anan. Ang iyang asawa bag-o lang sab nga nanganak.
Apan nagduda sab ang akong igsuon nga dili siya ang amahan sa bata hinungdan nga gusto niyang ipa DNA test ang bata aron pagsuta kon siya ba gyud ang papa. Kon pananglit mokiha ang iyang asawa og concubinage sa akong igsuon, mamahimo ba sab siyang mokiha og adultery batok sa iyang asawa kon masuta sa DNA nga dili siya ang amahan sa bata? Daghang salamat. — Jean
* * *
Dear Jean,
Kon adunay makuhang ebidensya ang asawa sa imong igsuon nga mopamatuod nga duna siyay laing babaye mamahimo gyud siyang ikiha og concubinage tungod kay kalapasan kana sa atong balaod ubos sa Art. 334 sa atong Revised Penal Code. Samtang kon ang iyang asawa masuta usab nga adunay laing lalaki ug ang resulta sa DNA mopamatuod nga dili iya ang bata then mamahimo sab niyang ikiha ang iyang asawa og adultery. Apan kon silang duha pulos sad-an then that’s another story tungod kay duna ‘tay legal maxim nga nagkanayon “ He who comes to court must do so with clean hands.”
Buot ipasabot nga ang bana or asawa nga namasangil ug modangop sa korte kinahanglan nga di sab siya guilty sa salaod nga iyang gipasangil sa iyang kapikas tungod kay kon silang duha pulos sad-an or “ in pare delicto” hayan ang korte dili makahatag sa ilang gipangayong pagsilot sa usa kanila kay pulos man sila nakasala. So, hayan mapugos gyud sila sa pagpadayon sa pagtipon. Apan kon mopasaka og kaso ang asawa batok sa imong igsuon ug masuta sa DNA nga imong igsuon gyud ang amahan sa bata buot ipasabot nga way nahimong kalapasan sa balaod ang iyang asawa so mamahimong makombikto ang imong igsuon sa kasong concubinage kay siya ra may nakahimo og krimen. Thanks and God bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkukes, Sabado ug Domingo.
- Latest
