EDITORYAL - “Pancit” wirings gihipos na gyud

Mga ‘’pancit wirings” diha sa kadalanan gipanangtang sa mga telecommunications companies, matud pa sa balita.

Panahon na aron manglimpyo kining mga telcos sa ilang paghugaw-hugaw diha sa kadalanan nianang ilang mga wires ug mga kable nga wala na panggamita apan wala nila panghipusa.

Karon nga importante na sa katawhan ang internet connections sa mga pribadong panimalay ug mga establisamento milyon-milyon ang kwarta ug ginansya aning mga telcos.

Ug mas mapadali ang pagpakabit nila sa mga linya nanguha sila og mga sub-contractors nga maoy manaod sa mga linya.

Apan kon obserbahan ang sistema nila sa pagtaud, daw naglumba sila kon kinsay makapataud og daghang linya kay inay nga pangitaon kadtong karaang linya aron didto mokonektar magtaud man sila og mga bag-ong linya.

Maayo hinuon kay bag-o ang kable ug siguro gyung walay problema sa koneksyon, apan ang nakaparat dili man nila pamutlon ug hipuson kadtong mga kableng wala na panggamita.

Ang uban niining mga kableha nag-edad na og tag napulo ka tuig, ang uban wala na gani gamita kay naputlan o wala na magpataud og telepono o internet o ba kaha cable tv ang mga customer nila kaniadto.

Kay imbes nga hipuson, gipasagdan ra gyud aning mga telcos ang maong mga kable, ang resulta magtipun-og diha sa ibabaw sa mga poste nga sama og mga pan-os nga pansit nga wala na tagda.

Gawas nga hugaw tan-awon naghatag kini og peligro sa publiko. Makapila na ka mga aksidente ang nahitabo nga diin may motorista nga nasangit ug nangaangol ug duna pa gyuy nangamatay tungod aning ilang walay pagtagad nga mga kable?

Sa miaging mga bulan, may mga telcos nga nanghipos ug nanangtang anang mga karaan nilang mga kable, nalipay tuod ang mga tawo ilabi na sa kabarangayan apan naglagot gihapon kay ang ilang mga pinutol wala man pangdad-a ug gibilin lang kilid sa mga poste diin nila kini gipamutol.