Alegre nga piniliay sa Mandaue

Nagkainit na gayud ang dagan sa pulitika sa Dakbayan sa Mandaue.

Gani nagsugod na og hinapakay og mga isyu ang kampo ni Mayor Luigi Quisumbing ug ang habig ni kanhi mayor ug karon Kongresista Jonas Cortes.

Sa nakalabay nga mga adlaw, mimando si Quisumbing sa Mandaue City Legal Department pagtan-aw sa iyang giingon nga mga anomalosong transaksiyon nga gipatuman kuno sa panahon sa administrasyon ni Cortes.

Pahit ni Quisumbing nga kwestiyonable kuno ang ubang transaksiyon nga gisudlan sa kagamhanan ni Cortes ug mga magpapatigayon sa dakbayan tungod lagi kay wala kuno kini pagtugot gikan sa konseho sa siyudad.

Apan matud pa sa kampo ni Cortes, walay anomaliya ang mga transaksiyon nga gisudlan sa niaging administrasyon.

Ang pasangil sa kampo ni Quisumbing kabahin lamang kuno sa dula sa pulitika niining panahona nga nangandan na ang duha ka kampo alang sa eleksiyon sa Mayo.

Hinuon dili na gayud mapugngan pa ang politikanhing bugno ni Quisumbing ug Cortes sa sunod piniliay.

Ang kanhi magkaalyado mao na karon ang magtigi alang sa labing taas nga puwesto sa lokal nga pangagamhanan sa siyudad.

Karon nga mipasiatab si Quisumbing nga anomaloso ang ubang transaksiyon ni Cortes kaniadto, unsa may lakang nga buhaton sa iyang kampo niini? Andam ba sila nga mopasaka og kaso batok sa kanhi mayor?

Apan angay lamang nga idiga ni Cortes ang iyang mga ebidensiya pagmatuod nga sayop ang alegasyon ni Quisumbing.

Kay kun maglisod pagprobar si Cortes nga walay trampas ang mao nga mga transaksiyon nga iyang gisudlan kaniadto, basin kon adunay epekto kini sa umaabot nga eleksiyon.

Hinuon makapaabot kita nga aduna pay daghang isyu nga motumaw batok sa isig ka habig.

Layo pa ang dakong adlaw sa Mayo.

Ug sa umaabot nga mga adlaw magpungasi unya ang mga paghot sa isi’g ka kampo.

Akong nakita nga alegre unya ang piniliay sa maong dakbayan.