Unsaon pagpakunhod sa presyo sa fuel

Akong balikon nga kon mosaka gani ang presyo sa gasolina, krudo ug ubang petroleum products, makamugna gyud kini og pagsaka sa kantidad sa atong mga palitonon. Unsa man ang angay’ng himoon kabahin niini? Ang akong sugyot mao ang pagtangtang sa Expanded Value Added Tax (EVAT) sa mga fuel products.

Unya, dili na kini ilakip sa pahamtangan og dugang buhis pinaagi sa gitawag og TRAIN Law.

Kon wad-on na sa kagamhanan ang EVAT ug ang pagpahamtang sa TRAIN Law sa mga produkto sa lana, sama sa krudo ug gasolina, sigurado nga mokunhod ang presyo sa mga petroleum products.

Kon barato na ang presyo sa gasolina, diha na nga higayon nga molihok ang kagamhanan.

Kinahanglang momando ang kagamhanan sa pagpamenos sa presyo sa mga baligya, ilabi na ang bugas, ug ang ubang mga nag-unang panginahanglanon sa panimalay.

Angay nga ang kagamhanan, apil na ang mga siyudad ug lungsod, magmugna gyud dayon og Price Monitoring Councils nga maniid kon gipakunhoran ba sa mga magpapatigayon ang presyo sa ilang mga baligya, ug sa bayad sa ubang mga serbisyo.

Unta, tun-an kining maong punto sa mga opisyal sa atong kagamhanan.

* * *

Ang ubang tag-iya og mga PUJ, wala na mopaayo sa mga gubaon nila nga sakyanan kay gianugonan nga basin og mausik lang ang ilang kuwarta kay gihugonhugonan man nga ilisan na ang mga PUJ og bag-ong klase sa sakyanan.

Ang higala nako nga nagpadagan og mga PUJ diri sa Barangay Busay, nindot kaayo og mga sakyanan kaniadto kay gamay’ng kakulian, iya dayong ipaayo aron nga magpabiling bag-o ug sinaw nga tan-awon.

Pero giingnan ko niya nga wala na kaayo siya karon magtagad sa iyang mga sakyanan tungod sa tinguha sa LTFRB nga pangilisan ang mga “existing PUJ’s” ug mga nindot na nga units.

Apan nindot gihapon tan-awon ang mga PUJ nga Mariners nga nagbiyahe diri sa Busay, kon itandi nianang uban, ilabi na nianang duha ka PUJ nga nagbiyahean sa Apas nga mora gyud tawon og lungon.

Pabor ko nga wad-on na kining mga PUJ nga dunot na kaayo, apil na kining mga gagmay, sama sa multicab, nga maglisud intawon ang mosakay tungod kay mag-abot ang mga tuhod sa pasahero.

Kining maong matang sa sakyanan nga pangpasahero, dili gayud unta angay’ng tugotan nga gamiton sa pamasahero.

Apan unsa kaha ang mahitabo kon mamalit og bag-ong sakyanan ang mga PUJ operators?

Lagmit nga ang ilang mga karaang units, ipamaligya nila aron gamiton na lang sa makapalit alang sa personal. Sa ato pa, mosamot kadaghan ang mga sakyanan nga magdagan sa atong mga karsada.

Nindot kon ang maong mga karaang PUJ, adto na lang pabiyaheon sa probinsiya.