Doktora nailad
Senior citizen nga doktora nakadawat og tawag gikan sa usa ka abogado nga anaa kuno trabaho sa US Embassy, Manila, diin gipahibalo nga nakaengkuwentro og bayolenting pasyente iyang anak nga doktora usab, kinsa atoa magtrabaho sa klinika sa Las Vegas, Nevada.
MatUd pa sa maong abogado, gibunala’g puthaw’ng silya ang iyang anak ug maayong pagkaigo ang dughan. Pero, nakabalos. Nakapunit og scalpel ug gidunggab-patay ang pasyente.
Hinuon, gitabangan dayon nila’g tago ang anak. Gidala sa usa ka ospital sa Clark Air Base, diin ang abogado mismo maoy mideposito’g P50T. Mipahayag ang abogado nga siya ang miasikaso sa tanang papeles para ma-release ang $74,000.00 nga dawatonon sa anak sa doktora gikan sa insurance sa Estados Unidos. Mao nga nangayo kini’g account number sa doktora sanglit adto man kini ideposito sa iyang account.
Tuod man, gihatagan sa doktora. Hasta personal family information gitug-an pUd. Dayon, mi-demand ang abogado nga kinahanglang mopadala’g P50T ang doktora aron mauli ang iyang gideposito. Kay kon dili, aw, dili na niya ipadayon ang pag-atiman sa anak sa doktora.
Ay, pwerteng karakara sa doktora! Pinangga niya iyang anak ug dili siya gustong mahanaw kini sa dayon. Haskang daliang naka-withdraw pinaagi sa ATM. Tapos, gipadala gilayon thru DEPOSIT-SEND TRANSACTION sa usa ka 24-hrs convenience store ang kuwartang gikinahanglan sa abogado.
Paglabay sa pipila ka oras, mitingog ang Viber sa selpon sa doktora. Nakurat siya kay dihang gipislit ang Video call, maoy iyang nakita sa pikas linya ang anak niyang doktora nga tua sa Nevada – ang anak nga giingon sa abogado nga naospital kuno. Pero dili diay tinuod, Nangilad lang diay ang tonto!
Milihok dayon ang pamilya sa doktora aron makuhag balik ang kuwarta. Apan ulahi na ang tanan, kay matud pa sa convenience store nakuha na kini sa nagpaka-abogadong swindler. Ilang gi-report sa NBI, pero giprangkahan sila nga dili na gyud ma-trace. Kay ang outlet nga nag-release sa kuwarta walay ID nga i-require ini’g claim sa gipadad-an.
Busa, tambag lang sa publiko. Ayaw gyu’g tubay o hatag og personal information sa mga callers nga wala mo kaila. Kay ang mga utok sa swindlers karon, sama sa computer, high tech na sab!
- Latest
