Tommy ug Duterte mag-estorya

Tan-aw nako, makaayo alang ni Mayor Tomas Osmeña kon mag-estoryahanay sila si Presidente Duterte kay iyang mapasabot nga dili tinuod ang ubang report nga miabot kaniya sa Malacañang.

Bisan ako, nga nadestino sa Cebu City Hall isip reporter sukad pa kaniadtong 2001, nasayod nga dili tinuod ang ubang report nga gipadangat kang Duterte sa iyang mga sinaligan dinhi sa Sugbo.

Una, dili tinuod nga gibawi ni Osmeña ang mga sakyanan sa City Hall nga gipagamit sa kapolisan. Gani, pagkakaron mga 90 ka lainlaing sakyanan sa City Hall ang padayong gigamit sa kapolisan ning dakbayan.

Nagkuha usab kining maong mga sakyanan og gasolina gikan sa “fuel depot” sa City Hall.

Wala usab putla ni Osmeña ang paghatag og binuwan nga honorarium sa mga polis. Kini ug uban pa, mapasabot ni Osmeña kon magkasultihanay na sila si Duterte.

* * *

Dunay programa sa radio station DYLA kada Sabado nga maghisgot sa mga maayong binuhatan ni kanhi presidente Ferdinand Marcos atol sa iyang administrasyon.

May kabuot na ko diha nga nahimong presidente si Marcos kaniadto. Dili ikalimod nga dunay mga anomaliya, sama gud karon, nga wala man gihapon mapuo ang mga anomaliya.

Sa paghisgot nila sa mga isyu, nasabot nako nga wala man sila mamakak. Wala man sila maghimohimo og mga estorya aron panindoton si Marcos.

Bisan ako, makasulti gyud sa pipila nako ka kasinatian.

Dihang nagtungha pa ko kaniadto sa elementarya, moabot didto sa hilit nga mga tunghaan sa probinsya kadtong mga sinako nga “powdered milk” nga gikan sa United States of America nga hinabang sa mga bata.

Ini’g kahapon, human namo og panilhig, maglinya dayon mi nga nagbitbit sa gitarotot nga karton o papel, kay panghatagan mi sa among maestra og powdered milk.

Unya, mikatap sa lainlaing eskuwelahan sa nasud kadtong gitawag og Marcos Pre-Fabricated school building.

Apan bisan pa og ibutang nato nga may kurakot nga nahitabo sa panahon kaniadto ni Marcos, angay ba gud nga iduhig nato ang kinatibuk-an niyang pamilya?

Apan dili ikalimod nga diriyot gyud makadaog si Bongbong Marcos diha nga milansar kini pagka bise presidente.

Sa ato pa, dili gusto ang katawhan nga iduhig ang mga anak sa namatay’ng presidente kon tinuod man nga nakahimo kini og sayop.

Karon, si Gobernador Imee Marcos nga anak ni kanhi presidente Marcos, gustong magpapili sa pagka senador, ug base sa survey, nag-una kini sa mga aspirants.

Para nako, dili maayong dauton ang dungog ni Imee tungod lang kay anak siya sa kanhi presidente. Kadaghan ba diha nga mga politiko nga dili apelyido og Marcos, nalambigit man lagi og Plunder case?