Lalis sa pletihan sa tricycle

Niadtong nakalabay’ng semana nakaestorya nako ang pipila ka mga tricycle drivers sa Dakbayan sa Lapu-Lapu mahitungod sa otso pesos nga minimum nga pletihan gikan sa naandan nga siete pesos.

Dako na kuno og ikatabang ang piso sa ilang kita labi na nga mahal na karon ang gasolina.

Apan ang problema nila kay ang mga pasahero dili man motuman, mokanaug ra kuno dayon tunol sa siete pesos imbes otso nga mao na untay minumum fare.

Kung paninglan nila sa otso pesos makiglalis pa kuno ang pasahero dayon diretso og lakaw.

Aron malikayan ang panaglalis sa driver ug pasahero kinahanglan nila i-display ang fare matrix gikan sa city hall diin nalatid ang pletihan depende sa gilay-on.

Apan bisan anaa nay taripa duna gyud gihapoy modunol sa siete pesos kay magkumkom naman daan og sensilyo unya ayha pa ihatag kon makakanaug na dayon lakaw.

Wala nay mahimo ang driver kay nakakanaug naman ang pasahero dawaton nalang ang siete pesos.

Aron malikayan kini, mas maayo seguro nga paninglan daan ang pasahero sa dili pa molarga ang tricycle sama sa systema sa v-hire.

Mas makaayo kini aron diretso nalang kanaug ang pasahero og dili na makamugna og trapik ang tricycle kay maghulat pa sa plete nga mao pay pagkuot sa bulsa inig kanaug.

Ang otso pesos nga pletihan dugay na diay kini nga gipatuman sa Lapu-Lapu City apan gipaubsan dihang nibarato kaniadto ang presyo sa lana apan karon nga nisaka ang presyo gibalik na sa naandan.

Pagsabot lang ang gikinahanglan gikan sa mga pasahero nga gikinahanglan na usab sa mga driver ang piso nga idugang sa ilang plete aron makabawi sa presyo sa gasolina nga padayong misaka.