Paabot og laing us-os sa lana
Sama sa panahon, mausab-usabon sab ang kalibutanong merkado sa lana.
Human nisulbong sa labing taas niyang ang-ang sa upat ka tuig sa niaging buwan, padayong nitidlom ang presyo sa lana sa labing ubos niyang ang-ang sa usa ka buwan karong semanaha.
Busa kon way kalit ug talagsaong panghitabo sa tungatungang sidlakan ug ubang bahin sa kalibutan nga makahulga sa kalibutanong suplay sa lana, mahimo nga malaslasan na sab ang taas pa gihapon nga presyo sa lana dinhi sa Pilipinas ug ubang kanasuran sa ikatulong sunud-sunod nga semana unya sa sunod semana.
* * *
Ang mosunod maoy nag-unang mga hinungdan sa padayon nga pagtibugsok sa presyo sa lana:
• Ang pasalig sa Saudi Arabia nga pun-an ang ilang produksiyon aron katapakan ang bisan unsang haw-ang nga mamugna sa pagdili na sa pagbaligya sa lana sa Iran ngadto sa ubang kanasuran;
• Pagsugot ni US President Donald Trump nga di hingpit nga putlon ang oil exports sa Iran;
• Pagsulbong sa imbentaryo sa lana sa Estados Unidos sa ikalimang sunud-sunod nga semana; ug
• Gikabalak-an nga pagluya sa kalibutanong ekonomiya nga mosangpot sa paghinay sa demanda sa lana.
* * *
May nag-ung-ong hinuon nga higanteng hulga sa relasyon sa Saudi Arabia ug ubang kanasuran tungod sa mga ebidensiya nga mahimong nahilambigit ang Royal Family sa Saudi sa pagpatay sa peryodistang si Jamal Khashoggi sud sa Saudi Consulate sa Turkey.
Bisan sa pag-insister ni Trump nga di maapektahan ang mga transaksiyon sa Estados Unidos ug Saudi, ang Amerikanhong Kongreso nidason na sa awhag sa ubang kanasuran pagpalagpot ni Crown Prince Mohammed bin Salman nga gitumbok nga maoy utok sa pagpatay.
* * *
Human nipasidaan nga manimawos sila sa bisan unsang silot nga ipahamtang, uban ang pasumbingay nga mahimong putlon nilang suplay sa lana sama sa oil embargo niadtong 1973 batok sa Estados Unidos ug ubang kanasuran nga nipaluyo sa Israel sa gubat sa Yom Kippur, karon si Saudi Energy Minister Khalid al Falih nipasalig nga way labot ang negosyo sa lana sa politikanhong krisis.
Gitulisok sa Saudi ang pipila ka security officials sa kamatayon ni Khashoggi. Apan niinsister si Turkish President Recep Tayyip Erdogan nga dugay nang giplano ang krimen sa labing taas nga mga opisyal sa Saudi.
* * *
- Latest
