EDITORYAL - Aksidente sa Lauis ledge

Duna na say aksidente sa kadagatan partikular diha sa Lauis Ledge sa kadagatan atbang sa dakbayan sa Talisay nga naa sa baba sa Mactan Channel diin sudlanan ug gawasanan sa mga barko madagko man o magagmay.

Niadtong Huwebes sa gabii, Oktubre 18 ning tuiga nagkabanggaanay ang usa ka fastcraft ug ang usa ka cargo vessel. Ang fastcraft padung sa Tubigon, Bohol samtang cargo vessel giingong nagpaabot o padung na modunggo sa Pier 6.

Ang Mactan Channel maoy usa sa mga labing grabe ka –busy ang maritime traffic gumikan sa mga barkong pampasahero ug mga nagdala og mga kargamento nga ipasulod ug ipagawas sa mga pantalan sa Cebu City ug Mandaue City.

Ang Lauis Ledge nahimutang sa habagatang bahin sa Mactan Channel ug ang aksidente sa miaging adlaw nga Huwebes nga miangol og upat ka pasahero sa fastcraft dili lang maoy unang aksidenteng nahitabo sa maong dapit.

Niadtong Agosto 16, tuig 2013 sa gabii nalunod sa maong lugar ang pasaheroang MV St. Thomas de Aquainas human nagkabangga sa cargo vessel nga MV Sulpicio Express 7.

Nakalas ang kapin 100 ka pasahero sa 715 nga sakay sa Aquianas. Samtang daghan usab ang na-missing. Nagbilin usab kini og polusyon sa kadagatan palibot duol sa Lauis Ledge partikular sa Lungsod sa Cordova.

Usa kadto sa mga ngilngig ug makasubo nga aksidente sa kasaysayan sa maritima dinhi sa Sugbo.

Samtang wala na gidungog kon unsa nay nahitabo sa dagan sa imbestigasyon ug sa kaso, apan adunay mga nanggawas nga mga maayong sugyot aron dili na kini masubli pa ang aksidente.

Matud pa nga gamay kaayo ang agianan Lauis Ledge nga maoy agianan sa mga barko ug may mga reklamo ang uban nga kinahanglang dugangan ang mga kahimanan alang sa luwas maritime traffic sa maong dapit.

Apan nahitabo nalang ang aksidente niadtong adlaw nga Huwebes walay bag-ong nadugang nga parola o kahimanan sukad nalunod ang Aquianas.