EDITORYAL - Pagtandi sa utokan ug hambugero

Sa sunod tuig hukman sa mga Pilipino ang mga tawong nangambisyon og posisyon sa gobiyerno. Mao lamang kini ang adlaw nga makabawos ang mga yanong Pilipino niadtong mga opisyales nga nagpabaya sa ilang trabaho. Unsa may angay nga himuong basehan unya sa mga botante paghukom niining mga nagpasubli ug kadtong karon palang motaak sa politika?

Ang mga magpasubli sa katungdanan o gustong mopapili sa mas taas nga posisyon sayon rang pangitaan og sayop kon gamiton lang gyud sa mga botante og maayo ang ilang hunahuna.

Una mao ang pagsubay kon unsa ilang nahimo sa nakalabay nilang mga termino.  Ikaduha, dali rang pangitaon ug sayon duolon.

Mao kini ang labing giabusaran nga linya sa mga politiko panahon sa kampanya apan ang kadaghanan nila mga bakakon.

Kon wala gani nila kini tumana, maayong ayaw nalang gyud ninyo botari pagbalik bisan unsa pang posisyon ilang daganan.

Sa mga bag-ohay palang misulod sa politika, kinahanglang duna na silay maayong agi isip miyembro sa katilingban.

Kinahanglan usab nga adunay plataporma nga dili imposibleng buhaton aron makab-ot, praktikal ug dili lisud ibaligya sa ubang mga opisyales, kaalyado man o taga oposisyon sa ilang lungsod o lalawigan.

Kinahanglang may solusyon sila aron matubag ang kakabus nga naglipang sa mga Pilipino,  sa mga isyu bahin sa health care program sa nasud, human rights violations, kahapsay ug kalinaw, edukasyon, katungod sa mga mamumuo sa inyong lugar ug uban pa.

Kinahanglan nga ang ilang mga tubag sa matag pangutana simple, matinud-anon , mubo apan dili imposibleng buhaton.

Anhi masukod kon utokan sila nga lider. Kon tag-as unya liko-liko nga tubag sa simpleng pangutana, tinubagan kini sa mga hambogero apan  way sulod ang ulo nga kandidato. Buwakbuwak ray daghan apan way unod sa iyang diskurso.

Dili sila angay saligan nga mamuno kay mausik lang ang panahon og kwarta sa katawhan pagpasweldo kanila.