Ang eleksyon kanhi ug karon

Alang kanatong mga senior citizen, ilabina niadtong dugay-dugay nang nagtikawtikaw ning kalibutana, makamatikod gyud sa mga kalainan sa eleksyon sa atong panahon ug sa karon.

Una sa tanan, ang eleksyon sa atong panahon, giisip nga usa ka balaang katungod pagpili kinsa ang atong palingkoron sa nagkalainlaing elective position sa gobiyerno. Imagine unsa ka dakung kaakohan ug responsibilidad ang gisangon nganhi kanato nga karon ato lang kining giduwaduwaan ug gi-negosyo.

Imagine, kon buot hunahunaon kita ang magbuot ug nagbuot unsa nga matang sa pangagamhanan ang atong masinati ug matagamtaman agad kon giunsa nato pag-exercise ang balaan natong katungod pagpili.

Sa ato nang gibalibalik dinhi, nga tungod kay balaan, makagaba kon ‘to kining yamayamaan. Ug niining atong kahimtang karon nga daghan ang nagping-ot ug nag-ilaid sa tumang kalisud, makaingon ba kita nga resulta na ba kini sa atong pagduwaduwa sa eleksyon? Gigabaan na ba kita?

Imagine samtang ang ubang kanasuran naglumba kinsa ang makauna pagpalupad og flying taxi, kita dinhi nagsalig sa mga habalhabal. Pastilan!

Kahinumdoman ko nga sa mga bata pa kami (dili pa elector), ang among mga ginikanan ug ubang katigulangan nga mga botante wa man mamaligya sa ilang mga katungod pagpili.

Qualification gayud ang ilang gibasihan pagpili, dili gumikan sa popularity ug kadaghan sa salapi sa kandidato, ug dili gumikan sa pagkasuod nga higala o pagkaparyente.

Nakahinumdom ko nga qualification gayud ang mao na kini ang gisangputan unahunaon ning nganhi kanato baga palingkoron sa nagkalainlaing exercise sa atong.

Ug niadtong mga panahona, mao ra man ug wa pa mauso ang mga political dynasties ug ang  “turncoatism” kon kining pag-ambak-abak og partido. Hinoon, duha ra may political party niadtong panahona: ang Nacionalista ug Liberal.

Dili pareho karon nga daghan na kaayong mga partido, ug bisa’g kinsa na ang makatuod og partido. Duwaduwa na lang gayud. Mga political parties nga walay klarong mga baruganan ug ideolohiya, ug unsay mga lagda ug mga plano sa pagpangamhanan … nga makatabang sa mga pumipili pag-decide kinsa ang most qualified nga mga kandidato.

Panaglitan, unsa may baruganan  sa PDP Laban o sa Hungpong ng Pagbabago o sa Liberal Party bahin sa isyu sa extra judicial killing o sa pagtukod sa China og mga dagkong infrastructure sa West Philippine Sea?

Sama sa America, ang mga baruganan sa Democrat ug sa Republican maoy dakung basihan sa mga botanteng Amerikano. Di ba ni mahimo dinhi sa atong nasud?