“Super City”

Niining pagpadayon sa proyekto sa Kawit Island nga makadugang sa dakung paglambo sa atong siyudad, nahinumdom ko sa nagbuntaog nga headline sa The Freeman mahitungod sa pagsaka ngadto sa ika-11 nga dapit isip ”super city” sa tibuok kalibutan, sumala sa index gihimo sa  Tholons Services Globalization karong tuiga.

Alang nako dagko kining hitabo sa atong dakbayan. Sayod man ta nga ang city hall dagku kaayo’g mga plano alang sa pagpalambo sa mga call centers  dinhi sa atong dakbayan  ug kini na-recognize sa ubang mga dakbayan sa kalibutan.

Ug bahin sa proyekto sa Kawit Island nga nahukman sa korte nga ipadayon, akong hunahuna, dili maayong hunahunaon nga ang korte nay mo-decide kon maayo ba o dili ang usa ka proyekto.

Buot nakong ipasabot nga dili kinahanglan nga magkinihaay una kita una mapadayon ang usa ka proyekto. Di ba mahimo nga sila na lang diha sa Konseho ang magsabutsabot aron dili na kinahanglanon ang intervention sa korte?

Lisud ba gud ni?

* * *

Samtang nagkasungi ang nagkalainlaing version sa mga draft Constitution, usa sa mga butang nga nagkasabot both ang mga magbabalaud sa administrasyon ug sa oposisyon pagtangtang sa term limits sa mga magbabalaud.

Sa ato pa, wala na unyay limit ang pag-alagad sa atong mga magbabalaud. Matud nila, ang mga botante, ang katawhan mismo maoy magbuot kon i-reelect ba ang usa ka magbabalaud o dili. Dili sama karon nga gi-set sa balaud kon pila ka tuig ang pag-alagad sa mga sakop sa Kongreso.

Usahay mahitabo nga ang usa ka maayong magbabalaud, gumikan sa term limits, dili na makapadayon pag-alagad, samtang ang usa ka walay hinungdan nga magbabalaud makapadayon sa pag-alagad basta ma-reelected lang.

Walay term limits ang 1935 Constitution, maoy hinungdan nga  matud ni Rep. Vicente Veloso sa Leyte nga  naka-produce kita’g dungganan nga mga magbabalaud ,”great legislators” sama kanila ni Senador Jose W. Diokno, Claro M. Recto, ug Raul Manglapus. They were good because they had no term limits.”

Dugang niini, ang dugay nga pag-alagad isip mga chairmen ug mga sakop sa nagkalainlaing komite sa Senado ug sa House maka-develop og expertise sa hingtungdan nga mga magbabalud. Sa ato pa, experienced nga mga magbabalaud.

Busa, sa bag-o  unya natong Batakang Balaud, wala nay term limits ang atong mga magbabalaud. Ug kita nang mga botante ang mopahamtang sa maong term limits pinaagi sa eleksyon,  agad sa performance isip magbabalaud, ug dili gumikan sa salapi ug pagka-celebrity.