Hipokrito walay luna sa langit

Dili tanang mosangpit sa Ginoo mahalangit. Kay pipila ba kanato ang magluhod-lakaw gikan sa pultahan sa simbahan hangtod na sa altar, nag-ampo nga unta iyang ihatag ang mahinungdanong butang nga atong gikinahanglan. Unya dihang nahatag na, wa na katultol sa simbahan.

Sa adlaw’ng Lunes hangtod sa Sabado, ang kompisalan sa Guadalupe Parish Church bukas gikan alas 5:00pm hangtod 6:00pm. Lamokon na lang ang pari sa pagpinaabot, pastilan, usa o duha ray manuol!

Apan sa adlaw’ng Domingo,  tiyempo sa pagpangalawat, haskang daghana ug taasa sa linya nga mangalawat.

Nagpasabot ba kini, nga mas daghan ang malinis og kalag kay sa nagkahugaw?  O, sagad nila, mi-short cut lang – mikalawat bisa’g way hugas ang konsensiya?

Mga igsoon ko, pahinumdom lang. Kon kita motambong og kombira sa kasal, kinahanglang magsul-ob pud tag sinina nga para sa maong okasyon. Kinahanglang manghugas gyud ta ug manglimpiyo sa atong mga kamot sa dili pa mokaon sa gipreparar nga bangkete sa Ginoo diha sa Iyang talad.

Samot na, kon kita motambong sa kombira diha sa Eyukaristiya, diin ang lawas ug dugo ni Kristo mao mismo ang Iyang gidalit alang kanatong mga bisita, diin kutob sa makakaon, maiyaha ang kinabuhing dayon ug kalipay’ng walay kataposan.

Nga sa ato pa, limpiyohan gyod diay nato daan sa tanang buling ang nagkahugaw tang kalag pinaagi sa pagpangompisal, ayha pa kita mokalawat sa lawas ni Hesukristo.

Dili kalimbongan ang Ginoo. Nasayod Siya kinsang politikoha ang kusog mosimba ug mokalawat, apan drug lord, korap ug  ismagler diay. Nasayod Siya kinsang lidera sa matag tinuohan ang maayo kaayo mosangyaw sa mga pulong sa Diyos pero wala sa buhat.

Resulta, nahimong uso ang pagpatay og tawo halos kada adlaw ning atong panahon karon. Gikan sa ultimo hangtod ngadto sa mga mayor, walay pili! Usahay, mapagan pa ang pari.

Miingon sila nga silot na kuno kini gikan sa Ginoo. No, dili! God is so good. Dili siya kaantigo mohatag og silot samtang buhi pa ang tawo. Kondili, pagpanguhit lang kini, pagpahibalo Niya ngadto sa mga nahisalaag nga ang pagkahipokrito wala man gani hatagi’g luna sa kasingkasing sa gipanglupigan dinhi sa yuta? Unsa na kaha didto sa langit?