EDITORYAL - Pamatasan sa opisyal

Nag-viral sa social media ang video footage sa usa ka eskandalo nga gikalambigitan sa usa sa mga kongresista diha sa Ninoy Aquino International Airport (NAIA) tungod sa matud pa walay pamatasang taras sa maong magbabalaod.

Way nikomento og pabor kang ACTS-OFW party-list Rep. Aniceto “John” Bertiz III sa iyang gibuhat nga pagtamay sa katungdanan sa airport security pinaagi sa iyang wala pagpatuo sa security protocol, pagpakita sa iyang identification card ug ang pagkuha pa gyud sa ID sa maong magbalantay.

Ang kahigpit sa seguridad sa mga tugpahanan dili lang diri sa Pilipinas kondili hasta pud sa tanang mga nasud gumikan sa hulga sa terorismo ug apil na ang pagpalusot og mga ilegal nga kontrabando sama sa armas , eksplosibo ug drugas. Nag-unang hinungdan sa hugot nga seguridad mao ang terorismo aron dili masubli ang nahitabo sa 911 hijacking didto sa Amerika nga niresulta sa September 11 bombing didto sa maong nasud niadtong tuig 2001.

Ang gobiyerno namalit og mga gamit ug ekipo aron makatabang sa seguridad ug kinahanglan ang mga pasahero mag-agi niini.

Gipaabot gyud nga mosunod niini mismo ang mga opisyales sa gobiyerno.

Bisan gani si Pres. Duterte moagi gyud gani ug magpakapkap sa iyang lawas diha sa security checking sa mga tugpahanan, nganong si Bertiz nagmagahi man ug unsa may naa niya nga wala ni Duterte?

Karon ang maong kongresista nangayo og pasaylo sa maong insidente. Apan paigo na lang ba ang pagpangayo og pasaylo?

Adunay imbestigasyon nga gihimo diha sa ethics committee sa Lower House batok kaniya ug aduna say laing reklamo siyang giatubang tungod sa reklamo sa usa ka OFW. Leksyon kini alang sa mga naa sa gobiyerno, dili unta nila ibutang sa peligro ang kinabuhi sa uban tungod lang kay sila saputon.

Labaw sa tanan di sila angay makalimot nga naa sila sa pwesto tungod sa mga tawo nga nisalig ug nituo kanila.