Tricycles wad-on sa national roads

Dunay awhag si DILG Secretary Eduardo Año ngadto sa mga mayor ug gobernador nga dili na gyud tugotan ang mga tricycle o pedicab nga makaagi sa mga national highway.

Nindot kaayo kining awhag ni Año sa mga mayor nga maoy pangulo sa mga local government units (LGU) apan sigurado ko nga maihap lang sa tudlo ang mga mayor nga may kaisog sa pagpatuman niini, ilabi na nga nagsingabot ang eleksiyon.

Makalagot kaayo kining mga tricycle nga maghatag ra og risgo kay hinay kaayong magpadagan ug makamugna ra og dugang problema sa trapiko kay makalangan man sa biyahe sa mga four-wheel vehicles.

Tan-awa to nga nahitabo sa Danao pipila ka semana ang nakalabay.

Usa ka tricycle nga puno sa mga pasahero nadasmagan sa usa ka bus, daghang patay ug angol.

Ang mga tricycle anha ra gyud na sa mga interior roads. Mahimo hinoon nga motabok sa mga national highways, apan dili kay anha magsubay sa ilang pagpamasahero.

Daghan kaayo kining maong mga talan-awon dinhi sa kalungsoran tungod kay ang mga opisyal hangol sa katungdanan ug mahadlok nga atol sa mga eleksiyon wala na’y mobotar kanila.

* * *

Nindot ang lakang ni Konsehal Dave Tumulak nga palapdan pa ang distansya gikan sa mga public places nga dili itugot ang pagpamaligya ug ang pagpainom og ilimnong makahubog.

Gikan sa 100 ka metros nga gilay-on, gusto ni Konsehal Tumulak nga usbon ang City Ordinance 1413 aron himoon na nga 150 metros ang distansya nga dili tugotan ang pagbutang og imnanan.

Kana lagi kon aktibo sab nga ipatuman sa mga tinugyanan sa balaod.

Atol sa public hearing kaniadtong Martes, usa ka abogado nga representante og unibersidad, miingon nga angay’ng tun-an pag-ayo kining maong ordinansahon kay duna may ubang delivery services nga mohatud og mga ilimnong makahubog.

Pananglit walay tindahan sa usa ka dapit duol sa public places, mahimo man nga manawag ug magpahatud sila og mainom.

Apan kon makita nga may mag-inom sa public place, igo man gihapon sila sa City Ordinance 512.

* * *

Wala pa ipahibalo sa mga tagdumala sa BOPK ug Barug PDP-Laban ang ilang mga kandidato, apan kaming mga sakop sa media, nakakuha na og mga ngalan.

Dunay mga lig-on sa ilang mga kandidato, apan duna sa’y mga dali ra nga pildihon.

Duha na ka eleksiyon nga wala gyud ko mosipyat sa akong paghimalad sa mga kandidato kon kinsa ang modaog ug mapilde.

Hashasan unya nato ang maong mga kandidato dinhi kon ibutyag na gyud ang ilang mga ngalan sa tagsatagsa nila ka grupo.