Baligyaanan og litson wa mosunod sa discount computation

Sa miaging Domingo, Septiyembre 2, mipalit ko’g litsong baboy sa usa ka sikat nga baligyaanan og litson diha sa Guadalupe. Usa ka kilong unod ug usa ka kilong tiil. Gigamitan ko kinig Senior Citizen card.

Ang kilo nila sa litson (lawas) tag P600 samtang ang tiil, tag P340. Kon tipunon, mosumada ngadto sa P940. Kon kuhaan kini’g husto nga SC discount, dakodako gyud og mamenus.

At least, makadaginot kining tigulang para sa pamahaw, paniudto ug sa akong panihapon. Rason kini, nganong mitingob na lang ko’g palit. Labi na, kay naa baya koy apo nga apil sa kuwentada.

Nakurat ko sa presentasyon sa pag-compute sa SC discount privilege nga giimprinta sa maong kan-anan. Tungod kay giingon nila ini, oh: LECHON 1KL. 600, LECHON FT 340 (wa butangig lKL), SUB TL 940. Unya misunod DSCNT 40. Ug SUBTL 900. Busa, ang gibutang nilang DUE AMOUNT:  900. Nia ang resibo, akong gitagoan.

Sanglit P1K man akong kuwarta, gisuklian ko’g  CHNGE P100 nga napatik gihapon sa invoice. Human sa CHNGE, misunod ang VAT SALES 803.57 ug 12% VAT 96.43. Unya, QUANTITY 2.

Mikunot akong agtang, uy! Kay bisag unsaon nakog kuwenta, (Commerce Accounting graduate god ko), murag wa man nila sunda’g husto ang  SC discount nga gustong iimplementar sa gobiyerno?

Di ba, ang eksaktong computation, Office of the Senior Citizens Affairs, Cebu City Hall, mao kining mosunod: TOTAL SALES less 12% VAT. Ang resulta human makuhaig 12% ang suma total nga bayranan, mao na sab kini ang kaltasan og 20% discount.

Ug kini makahatag sa tukmang kantidad nga mao ray bayran sa senior citizen? Sa ato pa, ang akong mabayran P714.29 ra unta ug dili P900.

Hinuon, di kay kadto ra nga tindahan ang mihimo ining ilang sukwahi nga komputasyon. Ubay-ubay ni sila. Gani, akong Kumare Ching, usa ka CPA reviewer sa USC, dihang nangaon sila diha sa usa sa mga restawran sa Ayala, mireklamo kay di husto ang pagkuwenta sa SC discount.

Hinungdan, nga mangutana ko: “Mayor Tommy, may mga restawran ba diay dinhi sa Sugbo nga exempted sa pagsunod sa eksaktong computation para sa SC discount? Mas maayo nga ato ning ipasusi ug ipatsek, Mayor, da!