Employer way katungod manghilabot sa sweldo

Dear Atty. Divine,

Usa ko ka katabang  sa panimalay ug nagtrabaho ko sud na sa usa ka tuig. Ang akong sweldo matag petsa 15 ug petsa 30 ihatag sa akong amo. Matag Domingo ang akong day-off  ug mao ni nga panahon nga mosuroy ko sa mga mall hinungdan nga  usahay matintal gyud ko sa pagpalit sa butang nga akong magustuhan.  Apan ang ako gyung kahibudngan kun duna koy paliton kay magyawyaw ang akong amo kay nag-usik- usik lang daw ko og kwarta. Matud niya nga dapat daw ko magtigom instead nga mamalit og mga butang. Sakitan lang ko maminaw niya kay ako man gud na nga tinarbahoan so dapat  wa na siyay labot kon unsaon nako paggasto ang akong sweldo. Ang akong pangutana kon duna bay katungod nga manghilabot ang akong amo kun unsaon nako paggasto  ang akong sweldo? Daghang salamat. —Julie

Dear Julie,

Base sa Sec. 27 sa Kasambahay law, wa gyuy katungod ang imong employer kon unsaon nimo sa paggasto ang imong sweldo. Matud sa maong balaod nga dili sab makapamugos ang employer sa pagpapalit sa bisan unsang butang nga gusto niyang ibaligya sa iyang katabang. Hinuon sakto man ang imong amo nga importante sab gyud nga adunay savings aron duna kay magamit panahon sa emergency apan dapat kutob lang siya sa pagtambag kanimo ug dili siya dapat manghilabot kon unsaon nimo paggasto ang imong sweldo. Thanks and God bless. —Atty. Divine

Alang sa inyong pangutana,  ipadala lang sa Legal  Corner sa Banat News sa V. Gullas St , Cebu City or email sa [email protected] og akong tubagon ang inyong pangutana pinaagi sa aking column matag Miyerkukes, Sabado og Doningo.