EDITORYAL - Kasikat, premyo ug ang Bandila

Usa sa mga paugnat sa kusog nga diin adunay dakong tsansang makadaog ang Pilipinas sa internasyonal nga kompetisyon kining combat sports sama sa boksing ug tanang matang sa martial arts discipline.

Dinhi nga sport nisikat ug nausab ang kinabuhi sa mga Pilipinong may kaisog ug lahutay.  Apan dili tanan ang nahatagan og maayong badlis sa kapalaran kay mas daghan ang nangabalda ug duna say mga nakabsan sa kinabuhi tungod niini.

Ang mga atleta sa combat sports sa amateur man o sa propesyonal pirmeng misugal sa ilang kinabuhi. Apan daghan kanila ang giabusaran sa mga mangwartahay nga promoters samtang walay gihimo ang gobiyerno aron sila panalipdan.

Ang uban nakaangkon pa gyud og wala nay pagkaalim nga kadaot dili lang sa ilang panglawas kondili hasta sa ilang emosyon ug panghunahuna ug karon gikalimtan na lang sa suok.

Ang Senado miaprubar bag-ohay lang sa ikatulo ug pinal nga pagbasa sa balaudnong mag-establisar sa gitawag nga Philippine Boxing and Combat Sports Commission. Tumong sa komisyon nga masiguro ang kaluwasan ug kaugmaon sa mga atleta sa combat sports. Ang Senate Bill 1306 o “Philippine Boxing and Combat Sports Commission Act of 2018,” nakakuha og 20 ka botos pabor niini ug way nibotar nga di pabor ug wa say nagdumili sa pagbotar.

Ang kaniadto gibiay-biayan nga si Sen. Manny Pacquiao kay walay nahimo diha sa senado, maoy nangamahan niini.

Ang mga atleta sa combat sports dili makalimod nga may dakong kwarta silang giagpas gikan niini. Apan gawas sa kasikat ug premyo, way Pilipinong misaka sa ruweda nga wala mopasigarbo sa iyang nasod bisan asa pa siya gidala sa iyang panimpalad.

Busa, makatarunganon lamang nga hatagan usab sila sa gobiyerno og proteksyon ug haom usab nga si Pacquiao kinsa sikat nga boksidor karon sa kalibotan maoy nangusog para sa mga atleta.