Hain ang langit ug impiyerno

Matag higayon nga supakon sa tawo ang mga sugo sa Ginoo, mao sab ning aktoha nga ang tawo wala moila og Ginoo. Bisan ang tawong hinimba pero wala puy-i sa tinuoray nga kinabuhi ang mga pulong sa Diyos panahon sa Liturhiya, diin ang pari maoy gihimo Niyang instrumento sa pagsabwag sa Maayong Balita, sama ra nga ang maong tawo wala motuo’g Ginoo.

Ubay-ubay’ng walay simba mitug-an nako nganong dili sila ganahan mosimba. Mga pari (hinuon dili tanan) ang ilang gipasanginlan nga maoy hinungdan. Unsaon,  ilang parokya nadestinohan og pari nga nakapaanak og gwapang dalaga. Usab, may kura paruko nga sa tago anaay kaugalingong pamilya. Hasta si Presidente Duterte, mitug-an sa publiko nga dunay pari nga ilang asawa atua gibalay sa Pasay City ug nagtukod og orphanage nga gipapuy-an sa ila mismong mga anak. Porbida, no? Tinuod kaha kining ilang mga alegasyon?

Giesplikaran ko ang mga walay simba. Nga sama nato, ang mga pari tawo ra usab. Dili perpekto ug matintal gyud sa pagpakasala. Pero dili ni pulidong rason nga di na lang ta mosimba ug motuo nga adunay Ginoo.

Nganong mosunod man ta sa ilang binuhatan kun nakit-an nato nga usa kini ka dakong sayop? Apan kinahanglan nga buhaton gyud nato ang unsay ilang gisulti diha sa paghubad sa mga pasumbingay sa ebanghelyo kay wala magagikan sa pari ang mga pulong nga manggawas sa ilang baba, kondili, gikan sa kasingkasing sa Espiritu Santo, diin sila mismong pari, apil sa gimaymayan-tudloan hain ang tarong dalan paingon sa Langit.

Nga sa ato pa, ang mga pulong sa Diyos alang gyud sa tanan. Kon ang pari dili mobuhat sa unsay iyang gisulti diha sa homily, iya ning dakong tulubagon sa Ginoo pag-abot sa adlaw sa paghukom. Ug mao usab kini atong dangatan kon magpabilin tang masinupakon.

May nangutana. Aduna bay langit ug impiyerno? Oo, anaa! Pero, ayaw’g hangad sa itaas kay wala didto ang Langit. Ayaw pod pagduko kay wala didto  ilawom sa yuta ang impiyerno. Tungod kay ang langit ug impiyerno anaa ra gyod sa atong kaugalingon, diin gihatagan tag free will sa Kahitas-an hain ug asa niini ang atong pilion!