Inugurasyon sa Abejo water system

Sugod karong semanahona, lagmit, at least kami sa balay, dili na maproblema sa tubig. Sa ato pa, dili na kinahanglan momata ko’g tungang  gabii hangtud sa kaadlawon, aron pagsawod og tubig. Lately walay agas MWF kay unahon ang subdivision sa Moterrazas. Kun moagas man TThSS, usahay hinay kaayo ang pressure, di kasaka sa tangke.

Sukad sa among pagpuyo diri (tunga-tunga sa mga subdivision Buena Hills ug Guadalajara), in 1988, wa gyud mi kasuway og 24-hour service sa tubig.

Sa niaging Domingo, gi-inugurahan sa Abejo Waters Corp. ang pagpatubig sa among dapit ug later sa mga sitio sa San Jorge, Tugasan, Baclayon, Tower O, ug Sandayong. Matud ni Borgy Abejo, ang ilang water system nga gikan sa deep well nilang Romy Gabutan maka-supply gikan sa 3,000 ngadto sa 4,000 ka households.

Pagkakaron, kapin na sa 1,200 ka panimalay ang ni-submit na sa ilang application for water connection.

Ang inugurasyon didto himoa sa basketbolan sa San Jorge, gitambongan mismo ni Mayor Tomas Osmeña uban nila ni Rep. Bebot Abellanosa, Konsehal Dave Tumulak ug Jun Gabuya, Kapitan Michael Gacasan (lagmit mag-city councilor), ug mga kagawad sa barangay.

Porbidang kusoga sa pressure (saylo sa atop) sa ilang pag-sample pagpaagas sa tubig. Gani, matud ni Romy Gabutan, wala pa i-apply ang full pressure.

At long last, dili na unya kami mahasol sa problema sa tubig.

*  * *

Mao ra man og  walay kasulbaran ang problema sa bugas. Ambot ngano nga wala man ni ma-anticipated sa gobiyerno, sa kadaghan maayong laki nga anaa karon nag-alirong ni Presidente Digong Duterte?

Sa ato nang gibalikbalik dinhi, sa ubang kanasuran, ilang number one priority mao ang food production aron nga kun unsay mahitabo, dili magutman ang katawhan. Hinoon, wala pa man ta magutmi pagkakaron apan nihit ug mahal na ang  bugas.

Ug tungod kay dili man priority ang food production, despite sa atong pagka-agricultural country, nagsalig kita sa importasyon. Ngil-ad paminawon nga dependent kita sa importasyon sa pagkaon taliwala sa ka tabunok sa atong kayutaan ug kaabunda sa pagkaon sa atong kadagatan ug kasapaan. Ironic kaayo. Apan si Senador Trillanes mao man ang atong gi-priority.

Karon dugang importasyon sa bugas ang gipaabot. Apan sama sa unang nangabot nga bugas, makasulbad kaha kini karon sa kanihit ug kamahal niini?

Lain nilang sulbad: sagulan og mais ang humay, kamote ug saging i-substitute sa bugas humay. Pastilan! Sa ubang nasud dugay na na silang nang-resign.