Ngano sa gabii manakit ang batiis (3)

Unsa may remedyo o angay nga buhaton aron dili na motukar kining makahasol nga panakit panahon sa kagabhion? Magdepende kini sa nagpaluyo nga hinungdan sama sa, kakulang sa tubig ang lawas, simple ra ang sulbad niini nga mao ang pag-inom og daghan tubig.

Sa ubang panagang o pag-alibyo ini, maoy buhaton ang mga mosunod:

* Hapyud-hapyora ang batiis — Mga usa ka oras sa dili pa mohigda o matulog, unaton (stretch) o pisilon paubos nga direksyon ang tiil gikan sa bat-ang, paa, bagtak, ngadto na sa lapalapa, nga haplasan og massage oil (coco o olive oil).

* Pagsul-ob og sapatos nga ‘ergonomic sole’ — Naay daghang baligya ini nga sapatos nga ang arko sa lapa-lapa nimo perpekto nakahaom sa tumbanan.

Likayan sab sa mga babaye ang pagsul-ob og sapatos nga  tag-as og tikod.

* Maligo ug magpa-alisngaw sa kainit sa tubig — Sa dili pa matulog, maayong maligo nga sagolag tubig ininit nga igong maagwanta ikaligo. Kini aron nga maka-relax ang kaunoran ug kaugatan.

* Magbutang og ‘heating pad’ o ‘hot compressed bag’ — Nga itapion o ihaklap sa apektadong batiis labi na sa bagtak, paa ug sa tiil, hasta na sa lapalapa.

* Suway og ‘Leg Acupuncture’ — Adunay nagtanyag og serbisyo niini nga ‘certified acupuncturist’ sa mga ‘holistic wellness clinic’. Aron i-relax ang imong batiis ug ubang parte sa tiil.

* Isiguro nga dili ka kulang sa potassium ug magnesium —  Ang duha ka mineral mopagana ug mopalig-on sa pinong kaugatan ug sa kaunoran aron hamugaway nga makaabot ang sirkulasyon sa dugo nga gikargahag mga nutrens.

* Kanunay ilakaw-lakaw — Ug dili batasanon nga manghimatiis sa hapon.