Dunay mga polis nga mangolekta?

Husto kaayo ang awhag ni Konsehal Joy Pesquera ngadto sa mga kapitan sa kabarangayan nga ipa-deputize ang ilang mga tanod sa CITOM aron nga makatabang kini pagpahapsay sa trapiko sa ilang mga lugar. Ang unang giawhag ni Pesquera mao ang mga kapitan sa Barangay Banilad, Talamban ug Mambaling. Giuyonan sa mga sakop sa Cebu City Council ang resolusyon ni Pesquera.

Dili na gyud unta angay’ng maghuwat pa ang mga kapitan nga awhagon pa sila nga ipa-deputize sa CITOM ang ilang mga tanod kon sila mismo nagpakabana sa problema sa trapiko sa ilang dapit.

Matag kakita nako og mga tanod nga motabang sa pagpahapsay sa trapiko, sa hilom modayeg gyud ko kanila, kay ako lang gani usahay mohunong man gyud ko sa usa ka dapit nga walay traffic enforcer aron hapsayon ang pag-agi sa mga sakyanan.

Gihatagan man hinoon ko ni Mayor Tomas Osmeña og pagtugot nga makapanakop ug makadumala sa trapiko isip sakop sa Task Force Alpha.

Busa, kamong ubang kapitan sa barangay, ayaw na mo paghuwat nga may konsehal na usab nga moawhag kaninyo.

* * *

Uy, atensyon mga polis diha sa Punta Princesa Police Station, gireklamo sa mga motorista ang pagbutang ninyo sa mga dinakpan ninyo nga mga motorsiklo diha daplin sa karsada duol sa inyong police station.

Dili ba maayo nga itugyan sa CITOM ang mga motor ug ubang sakyanan nga madakpan kon kini naglambigit sa trapiko?

Aw, kon ebidensya kini sa laing kaso, anha gyud sa kapolisan tipigi, apan ayaw ibutang sa mga dapit nga makahasol sa mangagi nga motorista.

* * *

Unsa ning reklamo nga akong nadawat nga ang mga senior citizens sa lungsod sa Cordova pangayoan man kuno og P30 kay amot sa pagpalit og lingkoranan, apan hangtud karon wala man sila makakita og lingkuranan nga napalit?

Pagbantay mo ha kay tingali baya og magka problema mo kon may mopasaka og kaso batok ninyo didto sa Ombudsman.

Ang reklamo nga akong nadawat nga kada higayon nga hatagan og cash assistance ang mga senior citizens, pangayoan gyud og P30.

* * *

Diha dapit sa Natalio Bacalso Avenue, dapit nianang usa ka pribadong unibersidad, dunay usa ka patrol vehicle nga magbalikbalik gyud kada gabii. Mohunong sa usa ka balay daplin sa karsada, ug may ihatag kanila, dayon molarga na.

Unsa man na diha, dili kaha na balay sa nagpadagan og mga ilegal, sama sa illegal swertres? Timan-i nga kada anha ninyo, may mga mata nga nagpaniid lang. Awhag nako sa informer nga kuhai og hulagway, ug ihatag nako.

Ang inyong mga report ipadala sa 0943-0766611.