Video karera sa Calamba

Nakadawat ko og text message nga nagpahibalo nga adunay gi-operate nga video karera ug moli-moli diha sa Sitio Mahayahay sa A. Lopez Street nga sakop sa Barangay Calamba.

Ang caretaker kuno niini mao ang usa ka Boy ug Liza nga matud sa akong informer, ilado kaayo sa mga polis nga nadestino sa Station 6 (Sawang Calero Police Station.)

Bi, atong pangutan-on ang mga polis kon nganong gipasagdan ra man ninyo ni?

Ang akong informer miingon nga usahay makakita sila’g mga polis nga moanha sa balay nga adunay video karera ug moli-moli, ug tingali kuno mokuha sa ilang payola.

Awhagon nako ang akong informer paghatag kanako og update, kon magkiyugpos ba gihapon ang mga polis.

* * *

Nakadawat usab ko og report nga nagbutyag sa ngalan sa polis nga maoy tigprotiher ug tigdawatan og payola gikan sa mga nag-operate og illegal gambling ug sa mga pagpamaligya og drugas diha sa Barangay San Roque, Barangay Caretta ug Barangay Tejero. Ang apelyido sa polis nagsugod sa letra nga “G.” Sagdi lang, himoan nato og report kining binuang niining maong polis ug ihatag nato sa ahensya nga makahimo og aksiyon batok sa ilegal niyang kalihokan.

Kining maong polis, giingon usab nga suod kaayong higala sa usa ka drug  lord nga nag-operate sa Barangay Ermita. Pastilan, dagko na kaayo og sweldo ang mga polis karon apan ang maong tinugyanan sa balaod, nagpabadlong pa gyud.

Buyno, ang akong inpormer diha sa Barangay Suba, wala pa  gayud makahatag og sketch sa nahimutangan sa mga video karera ug moli-moli. I-text sa 0943-0766611.

* * *

Hangtud karon, ang kadagkoan sa Cebu Provincial Environment and Natural Resources Office (PENRO) wala pa gihapon makahimo og aksiyon sa reklamo batok sa padayong pagpanguha og bas sa kabaybayonan sa Barangay Tambongon, lungsod sa San Remigio.

Kamo sab diha sa Department of Environment and Natural Resources (DENR), panid-i ninyo kon ang PENRO mituman ba sa ilang katungdanan. Suheto kaayo ko sa gireklamo nga baybayon kay ang among pinuy-anan sa probinsya anaa sa atbang ra niining nindot kaayong baybayon sa Tambongon.

Taas kaayo ang baybayon nga puti kaayo og bas. Wala lang kini kaayo mosikat kay kuwang sa propaganda. Kon dili maundang ang pagpanguha og bas sa maong baybayon aron ipanindot sa usa ka beach resort sa San Remigio, moabot ang higayon nga mga bato na lang ang mahibilin. Sa amo bitaw’ng dapit sa Barangay Lambusan, San Remigio, kaniadtong 1977, pwerteng nindota kay pino kaayo ang mga bas. Apan tungod sa pagtukod og daghang kabalayan nga gigamitan og semento pinaagi sa bas, anam-anam nga nahurot ang bas ug karon dagko kaayong mga bato ang mipuli.