EDITORYAL - Bag-ong hulga human sa ‘9/11’

Sud sa nakalabay nga 150 ka tuig, nasaksihan sa katawhan ang gubat sa mga nasud batok sa laing nasud diin milyones gyud ang mga nakalas sibilyan man o kasundalohan. Ang hinungdan, politika, impluwensya ug interes.

Sa pagtapos sa Cold War sa tuig 1989 natawo usab kining bag-ong hulga sa kalinaw, kining gitawag nga Islamic militancy. Nagsugod lang sa politikanhong rason apan nahimong personal sa uban.

Karong adlawa mao ang ika-18 nga kasumaran sa dakong panghitabo didto sa New York, sa Estados Unidos. Nakapausab sa panghunahuna sa mga lider sa kanasoran sa kalibotan  ang makalilisang nga September 11, 2001 terror attack.

Nianang adlawa 19 ka mga sakop sa al-Qaeda terror group ni Osama bin Laden ang miatake sa tulo ka maisip nga simbolo sa gahom sa Amerika gamit ang upat ka mga pasaheroang abyon nga ilang gi hijack. Tres mil ka tawo ang nakalas nianang adlawa.

Ang mga nasud sa kalibotan lakip na ang Pilipinas mikondenar sa maong pag-atake ug tanan misaad nga kombatihon kining bag-ong hulga.

Wala gyud magdugay naabot dinhi sa Pilipinas ang terorismo, 1990’s dihang nisulbong ang Abu Sayyaf.

Apan daw uhong nga nangguwa ang daghan pang mga terror groups didto sa Mindanao nga nagkagrabe ang kabangis kay dili na politikanhon ang ilang rason kondili nahimo na silang panatiko.

Bisan og daghang mga batid sa Islam nga misaway sa ilang sayop nga pagsabot sa ilang relihiyon, daghan ang nahaylo kay gusto og adbenturismo ug way nakagiya kanila.

Naapupa gyud ang gobiyerno sa pakigbatok kanila ug ang labing uwahi mao ang Marawi siege niadtong 2017 mugna sa ASG ug Maute nga nanumpa og pakig-abin sa Islamic State of Iraq and Syria (ISIS) sa Middle East.

Ang mga lider sa kanasoran kombinsidong mao na kini ang bag-ong panahon. Wa nay giyera tali sa mga nasud kondili gubat na kontra sa mga panatikong terorista.