EDITORYAL - Dangpanan sa tanan

Ang Korte Suprema maoy kataposang dangpanan sa katawhan sa interpretasyon sa mga balaod sa nasud. Ang mga mahistrado niini maoy giisip nga labing banggiitang makahubad sa tanang mga balaod nga hinimo sa mga magbabalaod alang sa hustong implimentasyon ug tukmang silot nga ipahamtang.

Sila usab maoy dangpanan sa mga dinaog-daog nga nagtuong gibuhatan sila og inhustisya sa mga gamhanang tawo nga may impluwensya pagpamaniobra ug pagbawog sa balaod.

Mao kini ang hinungdan kon nganong gikinahanglang matinud-anon ug may konsensya ug labaw sa tanan may pagmahal sa katarungan ang mga itudlong mahistrado sa Korte Suprema.

Gikinahanglan usab nga sila independente ug dili magawngan ni bisan kinsa, bisan sa presidente , Speaker of the House o Senate President gumikan kay parehas sila og gahom apan managlahi lamang og tahas subay sa Konstitusyon.

Apan unsaon man kon ang pipila ka mga sakop niini kadudahan man kon independente ba gyud? Dili man gyud mahitabong dili sila madudahan tungod kay silang tanan tinudlo man sa pangulo.

Karon sa kaso ni Senador Antonio Trillanes kinsa gimandoang ipadakop pinaagi sa Proklamasyon 572 ni Presidente Duterte midangop sa Korte Suprema.

Ang pagpadakop kaniya tungod sa pag-revoke sa Department of Justice sa amnestiya nga gihatag kaniya ni kanhi presidente Benigno Simeon “Noynoy” Aquino tungod sa giingong wala niini makompleto ang mga rekisitos. Apan ang senador nakapakita og mga pagmatuod nga kompleto siya ug mga kaubanang rebeldeng sundalo sa mga dokumento mao nga gihatagan sila og amnestiya.

Ang mga mata sa publiko nakatutok sa buhaton karon sa Korte Suprema sa pagduol kanila ni Trillanes. Si Trillanes maoy labing isog nga kritiko sa pangulo.

 Ang aksyon unya sa mga mahistrado niining kaso ni Trillanes mamahimong sukdanan sa publiko kon unsa sila kamatinud-anon.