Walay rice shortage

Gipanghimakak ni Presidente Rodrigo Duterte ang pasangil nga adunay rice shortage o kakuwangan sa bugas sa nasud sa Pilipinas. Ang pagpanghimakak sa presidente iya kining giluwatan atubangan sa mga Pinoy didto sa nasud sa Israel.

Dungan sa pagpanghimakak sa presidente mao usab ang iyang pagpika sa iyang mga kritiko tungod sa pagpamolitika niini sa isyu sa bugas. Ang presidente nagkanayon nga way shortage sa bugas sa nasud, gani adunay daghan ug naghinobra ang bugas sa Pilipinas.

Sa nasayran, nagbinasolay ang National Food Authority (NFA) ug ang inter-agency NFA Council tungod sa kakuwang sa bugas nga maoy nagpataas sa presyo sa bugas sa ubay-ubay nga bahin sa nasud ilabi na sa dakbayan sa Zamboanga nga mideklarar na gani og State of Calamity tungod sa ka mahal sa bugas sa ilang dapit nga miabot na sa tag P70 ang matag kilo niini. Ang ka mahal sa bugas nasinati usab sa mga lalawigan sa Basilan, Sulu ug Tawi-tawi.

Tungod sa kakuwang sa bugas nga miresulta sa pagtaas sa presyo sa bugas mao ang nahimong basihanan sa panawagan ni Senadora Cynthia Villar sa pagbungkag sa National Food Authority ug sa panawagan ni Bise Presidente Leni Robredo sa pagpalagpot ni Department of Agriculture (DA) Secretary Manny Pinol ug sa mga opisyal sa NFA nga gipangulohan ni Administrator Jason Aquino.  Seguro sakto ang presidente sa iyang giingon nga walay rice shortage sa Pilipinas tungod kay gikuptan niya ang mga kasayoran sa gidaghanon sa supply sa bugas. Pero makasiguro pud kaayo ta (kay nakasinati gyud ta) nga mitaas pud og maayo ang presyo sa rice. Pero ang pagbungkag ug pagpalagpot sa katungdanan sa mga opisyal sa NFA ug DA dili tubag sa suliran, gani makapagrabi pa kini sa suliran.

Ang angayan nga himoon sa nahisgotang mga opisyal mao ang pagtabang ug ang pag-agak sa ahensiya aron makahimo sa ilang trabaho ug ilang mapabarato ang mahal nga bugas.