Kabilin ni Tingting
Sa kataposang dagan sa piniliay ni kanhi Gobernador Vicente “Tingting” de la Serna, nikumpisal siya nako nga wa siyay kwarta. Nangahas lang siya og dagan aron paghatag sa katawhan sa ikaunom nga distrito sa Sugbo og laing kapilian.
Sa bisperas sa piniliay, nagpitipiti ang mga tawag sa iyang telepono. Nisumbong ang iyang mga lider nga nagsige nang pinalitay sa iyang mga kaatbang. Iya silang gipahinumdoman nga di sila mamalit. Gibalibaran niya ang mga lider nga nisugyot nga manghatag sila og tag-P50 bisan og tag-P300 ang palit sa pikas.
* * *
Bisan sa kapildehan ni de la Serna, giawhag ko niya sa pagdagan sa umaabot nga mga piniliay. Ang iyang kasinatian usa sa nakapakumbinser nako nga di makalahutay sa hugaw nga duwa sa politika.
Abunda siya og balikas sa paghulagway sa kahumok sa ilong sa mga botante alang sa mga magpapili nga magpabaha og kuwarta. Apan sa samang higayon kumbinsido si de la Serna nga nagkinahanglan sila og mas ligdong nga liderato. Busa di angay nga mohunong pagsuway ang mga may mas lunsay nga mga tinguha sa pag-alagad sa kinabag-an.
* * *
Nakugang ko dihang gipahibawo ni de la Serna sa iyang mga plano ug hubad sa politika sa Sugbo. Kay dihang gobernador pa siya sa Sugbo usa ko sa mga sakop sa media nga iyang nakasab-an sa Kapitolyo tungod sa akong mga komentaryo batok sa iyang pamunoan.
Mas nakugang ko dihang gipadad-an og armas sa akong pinuy-anan. Gipasabot ko niya nga samtang maayo nga unlan ang limpiyo nga konsiyensiya sa paghinanok matag gabii, di ko angay’ng magpatara. Apan akong gibalibaran ang iyang gasa.
* * *
Wa na mi magkasulti human niadto. Gipahibawo na lang ko sa suod niyang mga higala nga nasakit siya ug grabe nang iyang kanser sa baga. Hangtud nga maoy akong namat-an ang masulub-ong kasayuran sa iyang pagtaliwan.
Talagsaon ang matang sa mubo nga karera sa politika ni de la Serna. Wa kalahutay tungod sa naandan nga pagdominar sa kuwarta ug ubang mga maniobra. Higante niyang kabilin ang Provincial Ordinance 93-1 nga nihatag og kahigayonan sa mga kabos nga taga dakbayan sa pagpanag-iya sa mahalong mga luna nga maoy namat-an og buot sa ilang katiguwangan.
* * *
- Latest
