Mag-rally si Mayor Tomas

Kaniadtong Sabado sa alas 11:00 sa gabii,  Agosto 25, 2018 gikuha ni Mayor Tomas Osmeña sa Parian Police Station ang tulo ka mga dinakpan tungod sa pagpamaligya og refilled LPG nga gisud sa butane canisters sa T. Padilla Public Market niadtong Biyernes sa hapon.

Ang mga dinakpan nga gikuha sa mayor tungod kay siya na lamang ang mokustodiya niini mao sila si Ramir Amaca, Romeo Appareca ug Romeo Cueva. Tungod sa gihimo sa mayor ang kapolisan mikonsiderar karon sa pagpasaka og kaso batok kaniya.

Si Sr. Supt. Royina Garma ang director sa kapolisan sa dakbayan sa Sugbo nangayo sa mayor og balaud nga nagtugot kaniya sa pagkustodiya sa dinakpan sa polis.

Ang gihimo sa mayor ug ang laraw sa kapolisan sa pagpasaka og kaso batok kaniya nakapadugang sa dili maayong relasyon sa kapolisan ug kaniya  bisan pa man sa pamahayag ni Garma nga wala siyay problema sa iyang relasyon sa mayor.

Sa iyang usa ka minuto nga pakighinabi sa mga tigbalita gipahibawo sa mayor ang iyang pagpahigayon og rally batok sa mga nasayop nga polis karong Septiyembre 9 atol sa ika-140 ka tuig nga anibersaryo sa pagkatawo sa iyang apohan nga si kanhi presidente Sergio Osmeña Sr. Sa maong rally tubagon sa mayor ang mga isyu sa polis batok kaniya.

Sa maong adlaw dili kaha mobangon sa iyang lubnganan ang kalag sa iyang apohan o ba kaha mokanaug sa iyang monumento nga gibarugan ang estatuwa niini aron tulisokon ug yawyawan ang iyang apo nga nagpakauwaw sa ilang apelyido ug pangalan?

Kon buhi pa kaha ang apohan sa mayor dili pod kaha kini ang mangulo sa pagpahigayon og rally batok sa iyang apo tungod sa dayag nga pagpanalipod niini sa mga malapason sa balaud sama sa iyang pagkuha ug pagpabuhi sa tulo ka mga dinakpan sa kapolisan? Ambot laaaang.