EDITORYAL - Kakuwang og kahibawo

Ang kakuwang og kahibawo sa pipila ka konsehal sa lainlaing Local Government Units (LGU) kabahin sa mga termino sa parliamentary procedures, usahay moepekto og dili maayong sangpotanan sa ilang trabaho. Isip mga magbabalaod, angay’ng magtuon gyud unta sila sa termino sa parliamentary procedures aron dili sila masayop.

Dili pa lang dugay, dunay usa ka ordinansahon nga gisugyot ang konsehal sa Dakbayan sa Sugbo nga maghatag unta og pagtugot sa mga traffic enforcer nga makasakmit og lisensya sa mga drayber nga masakpang nakahimo og salaod sa lagda sa trapiko. Kay sila man maoy mayoriya sa konseho, sigurado na gyud unta nga mapasar kay diha na man kini sa third ug final deliberation.

Apan ang konsehal nasipyat sa paggamit og termino. Sanglit daghang isyu nga tukionon sa maong sesyon, misugyot siya sa iyang kaubanan nga i-withdraw niya ang iyang ordinansahon, ug giaprobahan sa konseho ang pag-withdraw.

Wala siya makabantay nga lahi ang epekto sa pag-withdraw sa usa ka legislative measure ug sa pag-defer lang unta sa maong ordinansahon, ug tukion kini pagbalik sa sunod sesyon.

Ang resulta, kon tinguha gyud nga hatagan nila og gahum ang mga traffic enforcer nga makasakmit og lisensya, mobalik na usab sa sinugdanan ang konseho, apil ang pagpahigayon og public hearing nga ang ipatawag, mao lang gihapon ang mga tawo nga napatawag na nila kaniadto ug nakahatag na sa ilang baruganan kabahin sa maong isyu.

Ang laing isyu nga gilalisan pag-ayo sa mga konsehal mao ang pag-move ni Vice Mayor Edgar Labella nga i-adjourn na ang sesyon.

Walay mitingog nga misupak sa pag-adjourn, ug ang nadungog sa secretariat mao ang tingog nga kinahanglan nilang debatehon. Hangtud nga may laing konsehal nga mi-second sa lakang pag-adjourn, ug nahimong final ang isyu. Angay’ng tun-an gyud pag-ayo sa mga magbabalaod ang Parliamentary Procedures aron epektibo ang ilang trabaho.