Pangaliya alang ni Paco
Samtang nanambong og Santos nga Misa, dayon nagmartsa ug nangaliya ang iyang mga paryente, mga higala ug mga dumadapig dinhi sa Sugbo sayo karong buntag, si Paco Larranaga pabiling nabilanggo sa Martutene sa Dakbayan sa San Sebastian sa Espanya.
Ika-21 na karon niyang tuig isip binilanggo. Duna pay nahibiling 19 ka tuig sa iyang sentensiya human nakonbikto sa Chiong case dinhi sa Sugbo. Padayon siyang nibarug nga way kalambigitan sa krimen. Bisan nagkahulogan nga di siya makagawas og mas sayo. Kay kinahanglan siyang moangkon sa krimen una mapapas o maibanan ang sentensiya.
* * *
Si Paco ang labing unang nakapahimus sa Philippines-Spain Treaty on the Transfer of Sentenced Persons, nga gidasonan sa mga Senado sa Pilipinas ug Espanya niadtong 2007 ubos sa pagpasiugda ni Sen. Miriam Defensor Santiago, nga maoy chairperson sa Senate foreign relations committee niadtong higayona.
Bisan tua na sa prisohan sa Espanya, ang sentensiya gihapon nga gipahamtang sa Pilipinas ang ipatuman. Pormal nang nihangyo ang Espanya nga palingkawason si Paco. Apan wa ni matuki sa pamunoan ni kanhi Presidente Noynoy Aquino. Gilusad sa niaging buwan ang kampanya paghangyo ni Presidente Rodrigo Duterte pag-iban sa sentensiya ni Paco.
* * *
Dihang gipahibawo nga ibalhin siya sa prisohan sa Espanya niadtong 2009, nahugno si Paco. Kay siya na ang mayor sa brigada sa Batang Cebu (BC .45). Nakapatuman na siya og mga proyekto alang sa mas maayong kahimtang sa Sugbuanong mga binilanggo, sama sa pagsemento sa ilang kadalanan uban sa tabang sa laing piniriso nga si kanhi Kongresista Romeo Jalosjos.
Nagmingaw si Paco sa una niyang prisohan sa Espanya, ang Centro Penitenciario Madrid Soto del Real. Wa siyay bisita. Ni kaila.
* * *
Nagsugod og hangop sa bag-o niyang kahimtang dihang gibalhin sa prisohan sa Martutene nga iyang gihulagway nga morang limpiyo nga ospital. Inilang pelotari sa San Sebastian ang iyang amahan nga si Manuel busa mas duol na sa iyang mga kadugo.
Gitugotan si Paco pagtiwas sa iyang pag-eskuyla nga naputol tungod sa Chiong case. Karon natuman nang iyang damgo nga mahimong chef sa restaurant sud sa walo ka takna matag adlaw uban ang binuwang suholan nga P61,000. Apan kinahanglan gihapon siyang matug sa prisohan human sa iyang trabaho.
* * *
- Latest
