Suspek o biktima?

Mora’g teleserye sa telebisyon ang panghitabo karon nga pagpamatay sa Metro Cebu.

Niadtong Lunes, naukay ang tanan human gikataho nga gi-ambush ang sakyanan nga gipanag-iya ni kanhi Tejero barangay kapitan ug karon Konsehal Jessielou Cadungog.

Wala sa iyang sakyanan si Cadungog ug ang iyang driver-bodyguard lang ang diha sa sakyanan atol sa panghitabo kinsa maoy nakapatay sa polis nga giingong mipusil na unta sa sakyanan sa opisyal sa barangay.

Patay dihadiha dayon ang usa sa giingong riding-in- tandem nga maoy mi-target sa sakyanan sa konsehal samtang ang usa wala maunsa ug anaa na karon gikustodiya sa CIDG-7.

Sama sa mga nagsunod sa salida, excited ang mga tawo nga makaila sa suspek nga giingong sakop sa idlas nga riding-in-tandem.

Misamot ang kakulbahinam dihang nabutyag nga sakop sa pwersa sa kapolisan ang nahay-ad nga suspek.

Ang namatay naila nga si PO3 Eugene Calumba sakop sa Drug Enforcement Unit sa Parian Police Station sa CCPO, samtang ang kauban niini mao si Michael Banua usa ka police agent.

Human mahukasi sa identity ang mga suspek, naghulat ang mga tawo unsa ang reaksyon sa liderato sa PNP, apan nakugang ang tanan sa wala damha nga twist o pagbali sa sugilanon.

Si Konsehal Cadungog na man hinoon ang kontrabida sa estorya kinsa maoy gipagawas nga responsable sa pagpatay sa pulis nga igo ra kuno mihimo og drug surveillance.

Naamong pa si Konsehal Dave Tumulak, deputy mayor for police matter tungod kay nanghilabot kuno sa mga ebidensya sa nahitabong krimen. Miangkon ang driver ni Cadungog nga wala makapabuto ang pulis, apan mibunot na kuno sa armas, mao nga iyang giunhan pagpusil.

Mora’g mao kini ang buslot nga magamit sa PNP batok sa kampo ni Cadungog. Sigurado gyud ang driver-bodyguard nga pusilon siya mao nga iyang gipusil? Basin baya og advance ra kaayo ang hunahuna niini ug mideretso na lang siya pagpusil sa polis?

 Daghan ang nag-atang sa sunod nga mahitabo kon si kinsa man gyud ang bida ug kontrabida sa crime reality drama sa dakbayan.