Mga tapolan nangayo’g balay ug pagkaon

Nanindog ang akong balhibo sa kahikurat dihang pag-abli nako sa among telebisyon, gibalita nga ang mga Badjao, nangayo’g balay, pagkaon, edukasyon ug pinansiyal nga hinabang sa gobiyerno.

Kini nagmatuod lang, nga sila nabuhi sa pagpakilimos.

Nanghalang ang akong mga kalimutaw uy! Napuling sa ilang gipangyawyaw.

Inig sulod nimo sa One Pavilion, Banawa, gikan sa basement parking area, dapit sa tuo makita ang mga buta nga nagmasahe sa mga adunahang kustomer, diin sila suholan sa makatagbaw’ng serbisyo nga ilang gidalit.

Ngiob ang ilang panan-aw, apan nagpakabuhi sa kahayag.

Pagkadalaygon!

Dili pareho sa mga Badjao, kinsa kompleto ug himsog ang panglawas. Hanas mohimo’g daghang bata unya nagsalig sa pagpunay’g pangayo.

Ambot, pila kaha ka mga sakyanan ang nangagaras sa gidalang lata sa batan-ong Badjao nga inahan, kinsa tuyoon gyud nga magkugos og bata inig panuktok nila sa bentana aron mangayo’g kuwarta sa drayber.   

Bisa’g gidili ang maong makauulaw nga pangita, hala padayon gihapon sa pagpakilimos kining mga anino nga ambot kanus-a pa kaha makat-on sa pagpanrabaho sa tinarong nga paagi aron may ikapalit sa inadlaw nilang panginahanglan?

Arang-arang pa ang tanom sa lasang kay bisan og walay mata, kamot, tiil, dalunggan ug hunahuna, nakahatag pa og tam-is nga bunga sa tawo.

Pero ang tawo sama sa Badjao, hitsas man unta ang pagkalalik ug nganong ang pagsige’g pangayo sa iyang isig ka tawo ug sa gobiyerno mao ra man intawon ang ilang nahibaw-an?

Unya kini ra ba sila, maoy gamiton sa mga binayrang raliyista sa pagbato og hugaw ngadto sa presidente sa Pilipinas.

Mao pa’y mangasuko kon dili dayon mahatag ang ilang giyangungo. Pagka-demanding!

Dili ba miingon man ang Ginoo, lihok tawo kay tabangan tika?

Busa, mga lider sa atong nasud, labi na ngadto ni Tatay Digong, hain ang maayo og wad-on na sa hingpit kanang 4Ps nga gihatag ngadto sa mga kabus? Kining programaha wala magtudlo sa mga pobre unsaon pagpangita’g kuwarta aron mabuhi, kon dili, nagpaundayon hinuon kini sa ilang pagkatapolan.

Hain kaha’y maayo og tudloan nato sila og panrabaho, o pagnegosyo hangtud makabarug sa kaugalingon nilang mga tiil?

Ug always say ‘No’ to corruption, kay ang nangurakot ra ang mabilyonaryo samtang ang Pilipinas nalumos sa utang ug kapait sa kahimtang.

Kaya ba?